Колку знаат вашите деца за своето семејство? Колку знаат за бабите, дедовците, тетките, чичковците… за родителите на нивната баба? Направете семејно стебло и на забавен начин раскажувајте им приказни за историјата на вашето семејство.
Децата ќе дознаат за своето семејство, ќе научат за врските меѓу членовите и ќе стекнат сознанија за своите корени.
Еве неколку предлози како да направите семејно дрво со своите деца.

Креативно дрво

Со помош на колаж-хартија направете дрво. Исечете мали стикери на кои ќе ги нацртате членовите на семејството. Залепете ги на дрвото и под секој стикер напишете го името.

3Д-семејно дрво

На ролната од хартиен бришач исечете мали отвори. Гранките направете ги од стапчиња од сладолед или направете слични од картон. На крајот од стапчињата од колаж-хартија направете лисја на кои ќе ги напишете имињата на членовите на семејството. Стапчињата ставете ги во отворите од ролната.

Семејно дрво со листови на преклоп

Од колаж-хартија направете стебло. Исечете ги лисјата на преклоп. Внатре залепете фотографија, а на надворешната страна напишете го името. Поставете ги лисјата на дрвото.

Семејно дрво во чаша

Наполнете со песок пластична чаша и забодете гранка во неа. На гранката закачете разнобојни лисја на кои ќе ги напишете имињата на членовите на семејството.

Фото-стебло

На стебло направено од колаж-хартија залепете исечени фотографии од членовите на семејството и поврзете ги со фломастер.

Лего-стебло

Од лего-коцки направете стебло на кое ќе ставите картички со фотографии и имиња на членовите на семејството.

Стебло на дланка

Нацртајте дрво и на гранките залепете дланки направени од колаж-хартија. Прстите може да послужат за да го разграните семејното дрво.

Фото: Пинтерес