Многу жени можат да потврдат дека слушнале негативни приказни за бременоста, особено за породувањето, многу години пред воопшто да почнат да размислуваат за раѓање. Жените сакаат да зборуваат за породувањето и да ги споделуваат своите искуства, што секако може да им помогне на идните мајки, но што значи тоа за жените кои сè уште не доживеале бременост и породување?

Стравот од породување се јавува кај многу трудници, а други жени, често блиски, од сопствената мајка, баба, тетка, братучетка, па до сосетка и колешка од работа, го отежнуваат уште повеќе пренесувајќи разни приказни за тешки породувања. Многумина од вас веројатно ги слушнале приказните на нашите баби дека жена на породување е „со една нога в гроб“, а сите, дури и оние чии породувања се „полесни“, се согласуваат дека породилната болка е една од најголемите болки што жената може да ги доживее. Има и приказни за психичка траума. Се разбира, не е сè толку црно, па нашите мајки и баби нè тешат со фактот дека секоја болка се заборава откако првпат ќе го фатите вашето дете в раце.

Затоа е интересна приказната за мајката и блогерка Џејми Рид, која го чека своето прво дете, а раскажува дека најдобриот совет што го добила е од маж!

Имено, откако ја објавила својата бременост, семеен пријател ѝ рекол: „Не слушај ги жените кои се обидуваат да те исплашат со своите хорор-приказни.“

Кога ќе забремените, нормално е да бидете љубопитни и да почнете да читате и да истражувате теми за кои претходно не сте биле заинтересирани, а понекогаш е корисно да ги слушнете искуствата и советите на други жени, мајки кои поминале низ сето тоа. Но, честопати мајките и жените воопшто се концентрираат на негативните работи што ги слушале уште од детството од другите жени околу нив.

Пријател на Џејми, чија сопруга била бремена првпат пред речиси 20 години, ѝ рекол дека е зачуден од работите што другите жени ѝ ги кажувале на неговата сопруга. Наместо да ѝ честитаат и да ѝ понудат поддршка во текот на бременоста, како едвај да чекале да ѝ кажат за нивното ужасно породување кое траело 72 часа, итни операции и трауматски искуства.

„Жените веќе знаат дека бременоста може да биде страшна, зошто се толку лоши едни кон други?“, ѝ рекол тој. Можеби повеќето жени навистина забораваат како било кога биле бремени првпат или тоа е некоја чудна „иницијација“ во „клубот на мајката“, но повеќето жени сè уште се свесни за сите ризици, компликации и потенцијално страшни ситуации кои можат да се појават, затоа што живееме во време на достапни информации на интернет, ТВ-серии и така натаму. Но, ако веќе сме свесни за сите опасности, слушањето на овие приказни како што се приближуваме до датумот на породување нема да ни олесни, ниту да помогне.

Џејми го споменала и своето искуство кога таа и нејзиниот сопруг разговарале со пар кој неодамна добил бебе. Сопругот на жената им кажал некои детали од породувањето, но неговата сопруга веднаш го потсетила дека нејзината ситуација е многу специфична и ретка и дека тоа не мора да им се случува на сите. Откако неодамна се породила, таа сè уште била свесна за тоа како може да се чувствуваат трудницата и идниот татко кога слушаат негативни приказни од породувањето. Иако има многу написи за тоа дека само жените можат да разберат бремена жена, во овој случај можеби сите треба да го послушаат овој маж, нели?

Затоа што секој има право да ја каже својата приказна за бременоста и породувањето, но можеби треба да се почека додека идната мајка не го искуси тоа. Џејми добила уште еден совет од нејзината снаа, која инсистирала да ги игнорира сите негативни коментари за нејзината бременост, раѓањето и воопшто родителството.

„Не слушај кога се жалат луѓето или кога сакаат да те плашат. Да се ​​има бебе е неверојатно искуство и не дозволувај некој да те плаши. Ќе го сакаш бебето повеќе отколку што можеш да замислиш“, ѝ рекла таа. И тоа е навистина сè што една идна мајка сака да слушне.

Извор