Болките во грбот се релативно честа појава во бременоста, а тие се резултат на зголемување на телесната тежина, промени во држењето на жената, со оглед на тоа што статиката се менува поради растот на матката, но може да биде и еден од симптомите за предвремено породување. Ако ве боли грбот, задолжително посетете лекар за да се отстрани сомнежот дека е почеток на предвремено породување. Кога знаете дека тоа не е компликација на бременоста, треба да се обидете да ја елиминирате болката.

Секако, како и секогаш, подобро е да се спречи отколку да се лечи, па затоа треба рано да размислите – обидете се да го држите под контрола зголемувањето на телесната тежина, да јадете правилно и да правите вежби приспособени на вашата моментална состојба и можности.

Ако сè уште чувствувате болки во грбот, не земајте лекови, туку обидете се да ги зајакнете мускулите на грбот и предниот абдоминален ѕид со посебни вежби, носете појас за трудници за да го подигне стомакот и да го намалите оптоварувањето на долниот дел од ‘рбетот, избегнувајте чевли со висока потпетица. Не стојте долго, а кога седите, исправете го грбот и кренете ги нозете на мала височина. Спијте на тврд душек, со перница под стомакот и меѓу колена, така што сè да е во иста рамнина.
Бидејќи треба да избегнувате какво било оптоварување на ‘рбетот, не кревајте тешки работи, ниту деца. Ако треба да кренете нешто, свиткајте ги колената и исправете го ‘рбетот, така што колената да го поднесат товарот.

Понекогаш може да помогне и масажата. Побарајте од вашиот сопруг да намачка масло на долниот дел од грбот, а потоа нежно нека ги масира мускулите на двете страни на ‘рбетот, од дното нагоре и однадвор.

За време на бременоста треба да носите градник кој одговара на вашите гради – веројатно ви треба поголем од претходно и оној со широки ремени, што може да ја издржи тежината на вашите гради. Мора да биде од природен материјал и мазен однатре, без тантела или украси, бидејќи така ќе се заштитат брадавиците.

Понекогаш се чувствувам како да не можам да дишам доволно, дали е ова нормално?

Да, но тоа треба да му го споменете на вашиот лекар, бидејќи ако трае подолго или ви прави проблем, треба да се консултирате со кардиолог. Внимавајте на тежината и внимавајте на вашето држење – исправете го ‘рбетот и држете се исправени, особено кога седите.

Често ми се врти кога ќе станам, дали е ова опасно?

Не, но треба да внимавате да не паднете. Станете полека од седечка или лежечка положба и не мрдајте нагло – почекајте додека не сте сигурни. Проверете ја крвната слика.

Цело време сум изморена

Модерната жена има неспоредливо повеќе обврски и стрес од жените од поранешните времиња и очекува многу од себе. Не е доволно што си бремена – што само по себе е труд за телото, туку си и успешна жена која работи одговорна работа, добра мајка, вредна домаќинка, се грижиш и за родителите…

Треба повеќе да одморате, да го искористите секој слободен момент за да седнете, да земете здив и да ги кренете нозете, а дел од вашите обврски да им препуштите на другите… Секако, заморот што го чувствувате може да дојде и од анемија, па затоа треба да го фокусирате вниманието на вашиот лекар на тоа и да го проверите статусот на вашата крвна слика.

Главоболките за време на бременоста можат да бидат последица на промена на хормоналниот статус, но не треба да се сфаќаат како да се ништо – тие можат да бидат и знак за нешто многу опасно, прееклампсија, нарушување кое се манифестира со висок крвен притисок, протеини во урината и оток. Ако наеднаш почнете да се дебелеете, крвниот притисок почнува да ви скока, помалку уринирате, нозете и рацете ви отекуваат, добивате силна главоболка придружена со визуелни нарушувања – трепкања, заматување, двојни слики – ВЕДНАШ обратете се кај вашиот лекар!

Ако немате други симптоми и главоболката е изолирана, секако треба да му кажете на вашиот лекар за тоа и да го следите крвниот притисок, но обидете се да се изборите со неа. Може да земате парацетамол, да се обидете да спиете, да пиете многу течности и некој да ви ги масира вратот и главата за да ја подобрите циркулацијата. Понекогаш помага и туширањето на вратот и лицето, што исто така ја подобрува и циркулацијата.

Извор