Родителството не е лесно, а особено не во оваа модерна ера со толку многу предизвици за кои не сме подготвени. Факт е дека денес родителите имаат пристап до неспоредливо поголем број информации и полесно е да се утврди дали правиме нешто погрешно или правилно. Слично на тоа, можеме полесно да научиме за различни стилови на родителство, техники и слично. Така можеме да откриеме какви грешки правиме. Еве кои грешки ги прават родителите на новите генерации.

Претеруваат со задоволување на потребите на децата

Често сакаме да им дадеме на нашите деца сè што можеме – од играчки до уреди, па и до искуства. Меѓутоа, претерувањето и давањето премногу на децата може да доведе до чувство на претерано значење кај децата, од една страна, и недостиг на ценење на работите, од друга страна. Важно е да ги научите децата на вредноста и важноста на трудот, како и одложеното задоволување и благодарност.

Премногу ги изложуваат децата на екраните

Технологијата е составен дел од модерниот живот, тоа е факт. Но, премногу време поминато пред екран може да има негативно влијание врз менталното и физичкото здравје на децата. Тоа е – повремено – добар начин да поминете некое време, но не и единствениот начин да го смирите детето или да го забавувате. Премногу часа пред екран може да доведе до премалку вежбање, слаб квалитет на спиење и недостиг на социјални вештини. Важно е да се постигне рамнотежа помеѓу играта на отворено и играта на екранот. Едноставно, а сепак тешко.

Хеликоптер-родителство

Природно е да се заштити детето, но преголемата заштита може да доведе до тоа детето да не развие издржливост и вештини за решавање проблеми. Децата мора да искусат предизвици и неуспеси за да пораснат во способни и независни возрасни. Родителот мора да му дозволи на детето да се соочи со препреки, притоа давајќи му поддршка и совети наместо да контролира сè. Родителите не поставуваат цврсти граници и дисциплина, а недоволно цврсти граници се една од болните точки на современото родителство.

Честопати причината за ова е фактот што родителите се плашат дека поставувањето граници и дисциплинирањето на нивните деца би можело да го наруши нивниот однос со нив. Сепак, цврстите граници и доследната дисциплина им помагаат на децата да ги разберат и прифатат правилата, да го почитуваат авторитетот и да развијат самоконтрола. Дисциплината мора да биде цврста, но со љубов, а и да се фокусира на учење, а не на казнување.

Ги споредуваат децата со другите

Веројатно најголемиот виновник за ова се социјалните мрежи. Додека гледаме како „совршените деца“ напредуваат во различни активности, често паѓаме во замката да ги споредуваме нашите деца со другите. Ова може да доведе до притисок и намалена самодоверба. Секое дете е уникатно и има уникатни силни и слаби страни и треба соодветно да се негува.

Им даваат поголемо значење на оценките отколку на чувствата

Академскиот успех е важен, но фокусирањето само на оценките и постигнувањата може негативно да влијае врз менталното здравје на детето. Многу родители вршат прекумерен притисок врз своите деца за да постигнат академски успех, без воопшто да размислуваат или да се грижат за емоционалната состојба на нивното дете. Важно е да негувате отворена комуникација со вашето дете, да работите на емоционалната интелигенција и да го ставите менталното здравје на прво место.

Самите родители не се добар пример

Децата секогаш учат повеќе од она што го правиме, а помалку од она што го слушаат од нас. Родителите кои практикуваат лоши навики, како што е прекумерното поминување време на екран, можат до бесвест да зборуваат за штетноста на екраните – но, децата ќе прават како што им одговара и како што гледаат. Истото важи и за здравиот начин на живот. Позитивниот модел доведува до добри навики, љубезност и дисциплина.

Ја занемаруваат важноста на играта

Денешните родители се исклучително фокусирани на структурираното учење и воннаставните активности, па затоа слободната игра често се занемарува. А токму слободната игра е од клучно значење за когнитивниот, социјалниот и емоционалниот развој. Родителите мора да му дозволат на своето дете доволно време за неструктурирана игра, креативност и истражување.

Извор