Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Мајка сум на две близначки, кои имаат 2 години и 5 месеци. Откако се родени, во текот на вечерта стануваат на 2-3 часа за млеко (од почеток беа на формула, од 1,5 година на козјо домашно млеко и сега, во овој период кога нема козјо млеко, пијат кравјо) и покрај тоа што добро се хранат во текот на денот, убаво вечераат и пијат по цело шише млеко пред спиење. На пример, заспиваат во 20:30, а до 23:30 тие веќе се будат и бараат млеко. Еден период заменив со чајче и вода, го прифаќаа, но сега веќе исклучиво млеко прифаќаат. Некогаш и само малку ќе се напијат и презаспиваат. Мислам дека се будат од навика. Пробав и да не им давам, ама тогаш уште повеќе плачат додека не го добијат млекото. Друг случај, едната од близначките има периоди кога многу често во текот на ноќта се буди, на 20-30 мин., плаче во сон и ми го бара мобилниот, кој инаку строго го забранувам и не ѝ го давам, но таа многу сака да гледа песнички на него. Кога ќе се приближам да ја гушнам за да ја смирам, таа ме мава, ми вика да се тргнам од неа, не дозволува да ја смирам, и сето тоа во сон. Во сон зборува и како бара да гледа Биби и Боби, приказна која инаку ја гледа во текот на денот на телевизор. Исто така, многу често ја затекнувам како седечки спие во креветчето. Би ве замолила за совет како да го поправиме ова, што да променам за да не се будат толку често навечер бидејќи и за нив не е добро, а и јас сум многу изморена и ненаспана, а тоа ми влијае и во текот на наредниот ден, многу нервозна и без трпение кон нив.

ОДГОВОР: Во овој период од развојот потребно е веќе да имате воспоставено дневни рутини и секако ритуал за заспивање со вашите деца. Редовните рутини пред спиење треба да бидат како на пример: капење, јадење, читање приказни или приспивни песни кои секогаш создаваат смирена атмосфера. Децата во овој период треба да бидат што понезависни во извршувањето на своите дневни активности, како хранење, облекување и сл. што ги прави посамоуверени и посреќни, а на тој начин ги развиваат храброста и индивидуалноста. Доколку сметате дека ги имате воспоставено таквите рутини, тогаш пробајте да го елиминирате или да го сведете на минимум количеството на млеко што вашите деца го консумираат преку денот.

Не споделивте дали децата го пијат млекото од чаша или од шише со цуцла. Доколку е тоа шише со цуцла, фиксацијата за млекото ќе биде поголема од причина што цуцлата ги враќа децата во некоја регресивна, но и смирувачка фаза, така што детето може долготрајно да ја користи како извор на задоволство бидејќи го враќа во оралната фаза од неговиот развој. Тоа што едно од близначињата е повознемирено во текот на ноќта и сето тоа го манифестира со плачење укажува на одредени необработени, а помалку стресни содржини и ситуации со кои се среќава во текот на денот. Споменавте дека во сон го бара телефонот кој вие строго го забранувате. Можеби вие во текот на денот доста често го користите тој уред пред неа, а во исто време не ѝ го одобрувате. Со тоа провоцирате кај неа лутина и гнев, огорченост и онеправданост која ја манифестира со удирање кон вас кога се обидувате да ја смирите. Исто така, споменавте дека во сонот ги бара цртаните со Биби и Боби. Тоа нека ве поттикне во текот на денот да ја следите додека ги гледа цртаните и да видите што е тоа што толку ја импресионира во нив, дали можеби е тоа нешто што таа мисли дека не го поседува, дали можеби се поистоветува со некој од ликовите. Разговарајте во врска со тоа. Играјте менување улоги. Бидете вие Боби, таа Биби и обратно. Видете што точно ја восхитува кај нив. Понудете им да си одберат кадифена играчка со омилен лик, Биби или Боби или пак животно, играчка која силно ќе ја гушнат кога заспиваат и ќе ја чуваат до себе во текот на ноќта. Таа може да им обезбеди поголема сигурност и задоволство, а со тоа и помирна ноќ.

Одговара: Христина Стефановска, психолог за деца и адолесценти, Здружение „Хармоничен свет”

е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.