Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Моето внуче има две години, но сѐ уште не сака да јаде само. Ќерка ми е загрижена, ме интересира како да постапи во врска со храната бидејќи тоа не сака само да посегне ни по лажичката ни по која било храна. Само си игра со храната, без разлика дали е во тврда или во течна состојба. Како ќерка ми да го натера да си стави храна во устата?

ОДГОВОР: Уште од најрана возраст во воспитниот процес на децата ги учиме како да пристапуваат кон одредени нешта, како да ги третираат. Храната и хранењето е еден од основните елементи на воспитување кој започнува уште со самото раѓање на детето. Пристапот и перцепцијата кон храната која ја има родителот ќе се рефлектира и кај детето.

Родителот е тој што треба да му претстави на детето колку е храната важна и да покажува зошто е таа важна. Кон неа смееме да се однесуваме на одреден начин и не смееме да се однесуваме на одреден начин, на пример, да ја фрламе, да ја користиме за игра и забава итн. Тоа се првите граници на тоа што може, а што не може да се прави. Започнете да му давате храна во многу мали оброци и секој прв обид за играње со храна скратете го и стопирајте го. Понекогаш дозволете му тоа да ве храни, а вие покажете дека уживате.

Стимулирајте ги моторичките способности во работата со раце. Редете макарони на стапчиња, давајте му завртки и навртки, играјте со тесто и пластелин. Дајте му чин на големо дете, доколку досега било во хранилка додека јаде, сега ставете го на трпезариската маса со возрасните. Бидејќи одбива да јаде само, односно веќе креирало таква навика, кога сакаме да ги смениме навиките, потребни се упорност, доследност и трпение.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца. На прашањата одговараат психолози и психотерапевти соработници на Деца.мк.