Институтот за трансфузиона медицина располага со доволни количества од факторите на коагулација за возрасните кои се болни од хемофилијa, информираат од Министерството за здравство. Од друга страна, децата што се на профилакса, велат, ќе бидат покриени со соодветната терапија за да не се доведе ниту еден живот во опасност.

Хемофилијата е болест кога крвавењето е голем проблем за оние што се соочуваат со неа. Таа е наследна генски условена состојба која се карактеризира со целосен недостиг или намалено ниво на факторите што учествуваат во запирање на крвавењето.

– Сите центри и региони во Македонија за трансфузиона медицина располагаат со потребните количини на фактори на коагулација до крајот на годината. Дополнително, во рамките на централна аптека при Институтот се располага со доволни количества на резерва на фактори на коагулација доколку се појави дополнителна потреба за покривање – информираат.

Министерството за здравство, велат оттаму, остварува чести средби со таргетираните групи и останува отворено за соработка за решавање на проблемите со кои се соочуваат.

На вчерашниот Светски ден на хемофилијата, родителите на деца со хемофилијa и возрасните болни истакнаа дека се во постојан грч поради можен недостиг на терапија, ситуација која неретко се случувала.