Ако ви претстои царски рез – иако тоа не е секогаш однапред познато, бидејќи во некои ситуации се прави итен царски рез – искуствата на жените што го поминале може да бидат корисни при подготовката. Пет мајки откриле што сакале да знаат пред да се породат:
Колку брзо се случуваат работите
Доколку лекарите при природно породување одлучат дека е време за итен царски рез, времето до средбата со бебето е многу, многу кратко. Па залудно не викаат итен царски рез, нели? Времето кое поминува од засекот до раѓањето на детето обично трае помалку од пет минути, додека со закажан царски рез работите се случуваат малку побавно, 15-20 минути, но секако е многу брзо.
Некои мајки чувствуваат дека се неуспешни
Некои мајки детално го планираат своето породување, но за жал, не секогаш сѐ оди според планот. Токму затоа, некои мајки сметаат дека се неуспешни бидејќи се породиле со царски рез, што не го планирале, а се чувствуваат како да изневериле некого – пред сè, нивното бебе и самите себе.
Чувството на разочарување е разбирливо бидејќи мајките во овој момент имаат измешани чувства, а разговорот со партнерот, пријателите, семејството и професионалците може да им помогне да се чувствуваат подобро. Иако вашите чувства се само ваши и никој не може да ви каже како треба да се чувствувате, имајте на ум дека вашето тело сè уште направило голема работа и дека ова мало суштество ве чека да уживате во заедничкиот живот. На крајот, најважно е да се донесе здраво бебе на свет, а како ќе се породите, не е важно.
Некои жени се чувствуваат како да се „прегазени од камион“
Како некој ќе се чувствува по царски рез е индивидуална работа, а една мајка вели дека се чувствувала како да ја удрил камион. Не е единствената, некои жени велат дека царскиот рез им бил толку непријатен и тежок, што посакувале да го задржат бебето во утробата. Од друга страна, некои мајки велат дека се чувствувале толку добро што можеле да одат на ручек речиси веднаш по породувањето.
Пораката на оваа мајка е да го очекуваме најлошото, но да се надеваме на најдоброто.
За некои, царскиот рез е многу позитивно искуство
Секое породување, без разлика дали е природно или со царски рез, е приказна за себе. Една мајка вели дека нејзиниот царски рез бил многу позитивно искуство и дека познава многу жени што на ист начин ги опишуваат своите породувања со царски рез. Таа вели дека би сакала да слушала повеќе за овие позитивни искуства пред породувањето и дека сега таа ќе разговара со идните мајки на овој начин.
Не смее да се јаде
Една мајка првично се обидувала да се породи по природен пат повеќе од 18 часа, но бидејќи бебето не сакало да се движи, на крајот морало да се направи итен царски рез. Сето тоа ја исцрпило, па, како што вели, гладувала и сакала само да јаде, но не ѝ било дозволено. Она што не го знаела е дека по царски рез не треба да се внесува ништо друго освен течности.
Автор: Наташа Златковиќ
912