Педијатарот д-р Нијам Линч од Корк сподели важен совет за родителите чии деца се болни. Таа истакна дека осетот за мирис може да одигра клучна улога во откривањето знаци на замор и дехидратација.

Кога детето е болно, родителите внимателно го следат секој симптом. Но, еден помалку познат знак на исцрпеност и дехидратација може да се открие токму преку мирисот.

Д-р Линч на својот инстаграм-профил сподели едноставен, но многу корисен совет: ако детето не внесува доволно калории или течности, телото брзо може да влезе во кетоза.

– Кога ќе се случи тоа, здивот на детето добива специфичен мирис – сличен на ацетон или отстранувач на лак за нокти – објаснува таа.

Овој мирис е знак дека треба веднаш да се побара лекарска помош. Таа предупреди дека истиот симптом може да укажува и на дијабетична кетоацидоза, сериозна и потенцијално опасна компликација на дијабетесот.

– Ако почувствувате мирис на ацетон во здивот на вашето дете, тоа може да значи дека влегло во кетоза поради недоволен внес на храна и течности.

Некои деца полесно влегуваат во кетоза, па овој симптом може да се појавува секојпат кога ќе се разболат. Но, ако го забележите првпат или ако се појави заедно со висока температура, силно повраќање, исип, намалена свест или раздразливост, веднаш побарајте лекарска помош.

Како да препознаете дехидратација кај детето?

Педијатрите предупредуваат дека симптомите на дехидратација не се секогаш очигледни, но можат да бидат многу сериозни.

Благи знаци на дехидратација

• Вртоглавица;
• Гадење или главоболка;
• Темножолта или кафеава урина;
• Намалена потреба за мокрење;
• Суви усни, јазик, уста или грло.

Тешка дехидратација (алармантни симптоми)

• Екстремна жед и летаргија;
• Бледа кожа и студени раце или нозе;
• Забрзано дишење и срцев ритам;
• Раздразливост, поспаност или збунетост;
• Отсуство на солзи при плачење.

Извор