Лекар ги предупредува родителите да не ја прават оваа грешка кога ги хранат бебињата со шише
Да се стане родител, значи да се соочите со многу совети – некои од нив лесно можете да ги игнорирате, некои ќе одлучите да ги примените според сопствениот инстинкт, додека некои ќе ви го олеснат животот ако ги послушате. Лекар ги повикува родителите да престанат да прават една работа додека го хранат своето бебе и советува што треба да прават наместо тоа. Д-р Сермед Межер споделил видео во кое се осврнува на прашањето на една мајка: зошто ги храниме бебињата додека лежат, кога самите не пиеме така? Тој целосно се согласил со неа.
Што е контролирано хранење со шише?
-Стандардните шишиња не го контролираат протокот на млеко на ист начин како и доењето, што значи дека, особено кај новороденчињата кои имаат мал стомак, млекото може брзо да го преплави нивниот стомак.
Тој им препорачува на родителите да ги хранат своите бебиња во седечка положба, додека шишето го држат хоризонтално, внимавајќи да не влегува воздух во цуцлата. Оваа техника е позната како контролирано хранење со шише. Во описот на видеото докторот дополнително ја објаснува важноста на оваа техника:
-Контролираното хранење со шише го имитира доењето и може да помогне да се намалат проблемите како голтање воздух, рефлукс и плукање кај бебињата. Овој метод овозможува бебињата да пијат побавно и да прават природни паузи, слични на доењето. Држејќи го шишето хоризонтално и дозволувајќи му на бебето активно да цица, наместо да му дозволите на млекото да тече слободно, помагате да се спречи голтање на вишокот воздух, што може да предизвика непријатност и колика.
Межер додава дека побавното темпо на хранење му дава време на желудникот на бебето да го свари млекото, намалувајќи го ризикот од прејадување и, според тоа, плукање и рефлукс.
-Вклучувањето на овој метод во вашата рутина може да обезбеди попријатно искуство за хранење на вашето бебе и да го поддржи здравото варење – заклучува тој.
Како да се примени контролирано хранење со шише?
Оваа техника можете да ја примените следејќи ги овие чекори:
-Седнете го бебето исправено и држете го шишето во хоризонтална положба. Нежно допирајте ја горната усна на вашето бебе со цуцлата додека не ја отвори устата. Оставете го бебето да ја земе цуцлата в уста и да почне да цица. Навалете го шишето кон бебето, така што цуцлата да е полна со млеко. Кога вашето бебе прави пауза, навалете го шишето надолу или извадете ја цуцлата за да може вашето бебе да одмори некое време. Наизменично хранете го и правете паузи – следете ги знаците на вашето бебе и престанете кога ќе се засити – советува лекарот.
Автор: Карина Шиждрак
