Со доаѓањето на летните денови многу родители се грижат за температурата на просторијата во која престојува бебето. И тоа обично вклучува постојано преиспитување на идеалната температура и често вклучување и исклучување на ладењето во просторијата. Подолу откриваме која е идеалната собна температура.

Американската академија за педијатрија ги предупредува родителите да внимаваат на превисоките температури кои, според медицинските истражувања, се поврзани со синдромот на ненадејна смрт на новороденче (СИДС).

Неопходно е да бидете сигурни дека температурата во просторијата во која престојува бебето не е само пријатна, туку и безбедна. Многу експерти препорачуваат температурата во просторијата во која е сместено бебето да се одржува помеѓу 18 и 22°C (секако варира во зависност од временските услови). Важно е да бидете сигурни дека на бебето не му е премногу топло или премногу ладно. Ако на бебето му стане премногу жешко, тоа може да биде подложено на поголем ризик од синдром на ненадејна смрт на новороденче (СИДС).

Ако мислите дека на вашето бебе му станува премногу жешко, проверете му го стомакот или задниот дел на вратот. Ова е најдобриот начин да се провери температурата. Ако е жешко или испотено, отстранете го слојот и проверете го повторно. Не грижете се ако рацете и нозете на вашето бебе се ладни бидејќи тоа е сосема нормално.

Ако на бебето му е премногу жешко, тоа брзо ќе се покаже. Во текот на летото многу бебиња добиваат исип од топлината – ова се мали ситни црвени дамки, груби на допир. Најчесто се јавуваат околу колената, лактите или вратот и на места каде што облеката е покрај телото. Со тоа, бебето само сака да каже дека му е жешко и дека треба да му ја тргнете облеката што е вишок. Исипот од топлината не е опасен и брзо ќе помине.

За мирни соништа, гледајте колку време бебето престојува на сонце и добро заштитете го од сонце и од топлотен удар.

Како да ја разладите просторијата каде што спие бебето?

Летната топлина со клима-уредите е поподнослива. Сепак, треба да се внимава кога станува збор за бебиња. Клима-уредот треба да се вклучи кога бебето не е во просторијата и да се исклучи кога ќе го заспиете бебето. Клима-уредот никогаш не треба да дува директно во бебето.

Ако немате клима-уред, стариот добар вентилатор ќе ви помогне да ја разладите просторијата. Истото правило важи и за вентилаторите – тие не смеат да дуваат додека бебето спие.

Влажните крпи, исто така, можат да помогнат во разладувањето на просторијата. Влагата што испарува од крпата може да го олади воздухот. Со разладена просторија, и мајката и бебето ќе имаат мирен сон.

Извор