Можеби се радувате што вашето дете се откажува од дневните дремки, но можеби сте нервозни затоа што тоа значи дека ќе изгубите скапоцено време за себе. Како и да е, можеби се прашувате кога децата престануваат да дремат попладне.
Педијатарот д-р Крупа Плејфорт вели дека сонот е клучен за сите, особено за децата кои растат и се развиваат.
„Сѐ повеќе истражувања потврдуваат дека висококвалитетниот, конзистентен сон со соодветно времетраење му помага на телото да функционира. Имаме дури и студии кои ни покажуваат дека дневните дремки можат да им помогнат на децата од предучилишна возраст да научат и да запомнат информации“, објаснува таа и додава дека спиењето е неопходно за раст и развој на мозокот, регулирање на расположението и за закрепнување.
Според педијатрите, распоредот за дремка варира во зависност од возраста на децата.
„Помеѓу првата и втората година повеќето деца преминуваат од два дневни одмори на еден. Исто така, нормално е да се забележи промена во шемите на спиење околу возраст од 2 и 3 години, но на повеќето деца под 3 години сè уште им е потребна попладневна дремка“, вели таа.

На возраст од 3 до 4 години децата почнуваат да „кокетираат“ со одењето в кревет, но сепак им е потребен дневен одмор за да им помогне да го поминат остатокот од денот.
„Ако вашето 3-годишно дете сè уште спие во текот на денот, а спие добро и навечер, нема потреба да му ги укинувате дремките. Запомнете дека на децата на возраст меѓу 3 и 5 години обично им требаат помеѓу 10 и 13 часа сон на ден“, забележува таа.
Според анкетите, приближно 60 отсто од 4-годишните деца имаат попладневна дремка, додека само мал дел од 5-годишните применуваат дневна дремка.