Учењето емоционални вештини во училиште може да ги подобри оценките и самодовербата
Во последниве години социо-емоционалните вештини добиваат поголемо внимание во училиштата. Неодамнешните истражувања покажуваат дека децата што ги учат овие вештини – како што се регулирање на емоциите, емпатија и решавање конфликти – не само што постигнуваат подобри резултати во меѓучовечките односи, туку и постигнуваат подобри резултати на тестовите по математика и читање. Кристина Чипријано, доктор на науки и магистер по уметност од Центарот за студии за деца на „Јејл“, вели:
-Истражувањата покажуваат дека децата што учат како да ги препознаваат и контролираат своите емоции, да решаваат конфликти и подобро да соработуваат со другите, всушност, постигнуваат подобри резултати во училиште. Според податоците од Универзитетот „Јејл“, ваквите програми можат да го подобрат целокупниот образовен успех за околу 8 проценти.
Истражувачите анализирале 40 студии, вклучувајќи речиси 34.000 ученици од 12 земји, и откриле дека предавањето социо-емоционални вештини како посебен предмет ги зголемило резултатите по читање за 6,3 перцентили, а резултатите по математика за 3,8 перцентили.
Што вклучува предавањето по социо-емоционални вештини?
Учењето на овие вештини развива пет клучни способности:
-Самосвест
-Социјална свест
-Вештини за самоуправување
-Вештини за односи
-Одговорно донесување одлуки.
-Социо-емоционалното учење е клучно за здрав развој на детето. Училиштето е местото каде што децата го поминуваат поголемиот дел од денот и каде што можат да се поддржат нивните социјални и емоционални потреби – објаснува Сара Давидон, доктор по медицина од Медицинскиот факултет при Универзитетот „Џорџтаун“.
Овие вештини, исто така, помагаат да се намалат разликите во постигнувањата кај учениците, особено оние што доаѓаат од посиромашни или стресни средини. Децата што учат како да управуваат со стресот и да соработуваат со другите подобро се справуваат со предизвиците во училиштето, вели д-р Давидон.
Р. Елизабет Капс, доктор на науки од Универзитетот „Кејс Вестерн Резерв“, додава:
-Учењето на овие вештини го поставува тонот за целото училиште и покажува дека благосостојбата на секој ученик е важна за учењето. Тоа гради позитивна училишна клима што им користи на сите ученици.
Како да препознаете подобрување во социо-емоционалното здравје?
Децата што ги развиваат овие вештини:
-подобро соработуваат и градат односи со врсници и наставници
-покажуваат поголема мотивација и ангажираност во учењето
-добиваат подобри оценки и одат на училиште почесто
-имаат помалку проблеми со дисциплината.
Експертите ги советуваат родителите како да ги поттикнат овие вештини дома:
-моделирајте регулација на емоциите и објаснувајте ги своите чувства
-зборувајте за чувствата редовно
-читајте заедно и разговарајте за емоциите на ликовите
-решавајте конфликти заедно
-одржувајте предвидливи рутини кои обезбедуваат безбедност
-признавајте ги емоциите додека поставувате граници („Гледам дека си лут, но удирањето не е во ред“).
Со малку внимание и водство, социо-емоционалните вештини можат да ги направат децата посреќни, поотпорни и поуспешни во училиште и понатаму.
