Финците важат за најписмена нација во светот, а нивните ученици редовно постигнуваат врвни резултати на меѓународните ПИСА-тестови. Уште од рана возраст образованието е насочено кон игра и учење преку искуство. Децата започнуваат со формално образование на седум години, а предучилишното образование е задолжително и вклучува околу 700 часа креативни и јазични активности.

Основното образование трае од прво до деветто одделение и има цел да ги формира учениците во хумани и одговорни личности, но и да им овозможи практични знаења и вештини. Наставата е организирана со околу дваесет предмети, но учењето е поставено така што доминира практичната работа, а домашните задачи се многу помалку застапени отколку во други системи.

Училишниот ден е релативно краток. Во прво и второ одделение учениците имаат најмногу пет часа дневно. Секој час трае околу 45 минути, со паузи од 15 минути помеѓу часовите и најмалку половина час за ручек. Ручекот е бесплатен, а за време на паузите децата излегуваат надвор, освен ако температурата не падне под –15 степени.

Учениците добиваат домашни задачи, но во просек тоа е околу половина час дневно. Првиот стандарден тест, матурата, го полагаат на 18 години, а резултатите се користат за упис на универзитет. До четврто одделение учениците имаат описни оценки за напредокот, а потоа следуваат класични оценки.

Образованието е бесплатно за сите, а и високообразовните студии не се наплаќаат за граѓаните на ЕУ. Наставниците се многу ценети професионалци со магистратура и имаат клучна улога во поттикнувањето на самостојноста и развојот на учениците.

Финскиот систем нуди пократки училишни денови, повеќе паузи и учење преку работа, но некои сметаат дека групниот пристап не остава доволно простор за најталентираните ученици да напредуваат побрзо.

Извор