Во првата година од животот бебињата се развиваат и растат многу интензивно, иако треба да имате предвид дека секое малечко се развива со свое темпо, па затоа не е многу добро да се водите од искуствата на другите. Сепак, развојот на бебето треба внимателно да се следи и во случај на какви било грижи најдобро е да се контактира експерт кој ќе ви каже дали навистина има причина за грижа.

Но, важно е да знаете кои сигнали можат да укажуваат на застој во развојот.

Бебе од 4 месеци

Потенцијалните знаци на застој во развојот на оваа возраст се:

-Тешкотии при фиксирање предмети со очите. До три месеци приближувањето на двете очи до носот е честа појава: факт е дека во раните фази бебињата сè уште не се во можност целосно да ги контролираат очните мускули. Но, до четвртиот месец бебето треба спонтано да го надмине тоа.
-Отсуство на реакција на гласни звуци: Бебињата реагираат на ненадејни звуци со вртење на главата кон изворот на бучавата и затворање на очите, грчење, па дури и може да заплачат. Ако ништо од ова не се случи, посетете го вашиот лекар.

-Бебето не обрнува внимание на своите раце, не ги гледа (од два месеца): Оваа вештина е последица на фактот дека децата учат да ги концентрираат очите на предмети. Прегледот на рацете укажува на доволна зрелост на очниот апарат.

-Не ги следи подвижните предмети со очите (до 3 месеци).

-Не посегнува со раката, ниту фаќа предмети (од три месеци).

-Не се насмевнува (до три месеци): Насмевката е знак на социјализација. До третиот месец бебето треба да се насмевнува на играчки и нс луѓе.

-Не ја држи главата стабилно: До третиот месец бебето веќе има доволно силни мускули на вратот за самостојно да ја држи главата без потреба да биде поткрепено.

-Не гуга, ниту се обидува да испушта звуци (до 4 месеци).

-Не става предмети в уста (до 4 месеци).

-Не се обидува да се турка од подот кога ќе почувствува тврда површина (до четири месеци).

7-месечно бебе

-Опуштени мускули: Ако детето има намален мускулен тонус во рацете и нозете и е премногу слабо, консултирајте се со лекар. Масажите и специјализираните вежби можат да помогнат.

-Мускули кои се премногу стегнати.

-Испружува само една рака: Можно е едната рака да била оштетена за време на породувањето или бебето да има проблеми со ‘рбетот – токму ‘рбетот е одговорен за нормалното функционирање на сите делови од телото.

-Главата е сè уште навалена наназад кога бебето се обидува да седне.

-Бебето одбива да биде гушкано.

-Не покажува наклонетост кон родителите: Социјализацијата на детето се случува во најраните фази, во вториот или третиот месец. Прво има насмевка, потоа смеа и прегратки со родителите, бабите и дедовците.

-Долгорочни солзења на очите или чувствителност на светлина: Ова може да укажува на воспалителен процес во солзниот канал, развој на алергии или конјунктивитис.
-Детето има тешкотии со носење предмети до устата.

-Не може самостојно да се свртува лево и десно (до пет месеци).

-Не може да седи дури ни со потпора (до шест месеци): Ова може да биде сигнал дека ‘рбетот на бебето не е добро развиен, тој е одговорен за рамнотежата.

-Не се насмевнува (до шест месеци).

По 12 месеци

-Не може да лази или го прави тоа влечејќи ја едната страна од телото.

-Не може да стои дури и ако го држите: На оваа возраст, вашето бебе ги вежба движењата што ги научило пред да наполни една година. Неговиот ‘рбет е веќе доволно развиен за широк спектар на движења, па ако вашето дете не може да стои исправено дури и со ваша помош, задолжително консултирајте се со специјалист.

-Не бара предмети за кои разбира дека се скриени: Детето развива интерес за разни видови игри и со љубопитност ги набљудува постапките на возрасните (особено оние поврзани со нив). До оваа возраст детето ужива во интеракцијата со возрасните и играњето со нив.

-Сè уште не кажало ниту еден збор: На девет месеци единечните повторувачки слогови („ма-ма“, „та-та“, „ба-ба“) можат да се перципираат како зборови. До една година, бебето повеќе не испушта бесмислени звуци и почнува да ги изговара своите први значајни „бебешки“ зборови: „ау-ау“, „мјау“, „ку-ку“ и така натаму.

-Не користи гестови како што е тресење на главата од една на друга страна за да каже „не“: До осум-девет месеци децата учат да ги изразуваат своите желби со гестови бидејќи тоа е единствениот начин да ги изразат своите желби без да ги знаат сите зборови и нивните значења.

-Не покажува кон предмети со прст.

-Не научило да оди (на осумнаесет месеци).

-Сè уште оди на прсти, иако научило да оди пред неколку месеци: Кога бебето учи да оди, секогаш оди на прсти, но по неколку месеци и неговите петици почнуваат да се движат. Ако бебето продолжи да оди на прсти, ова може да укажува на зголемена нервна раздразливост. Ова може да се должи на предвремено породување, хипертензија или преосетливост. Овој недостаток обично може лесно да се реши со неколку сеанси на масажа.

Автор: Наташа Златковиќ

Извор