Драги мајки, можете да се подготвите за природно, мирно, опуштено и убаво породување на неколку начини, од кои првиот е едукацијата. Можете да се едуцирате преку курсеви, работилници, книги или прирачници за бремени жени и нивните партнери. На нив ќе сретнете водичи кои ќе ве научат како да си ја олесните бременоста и да се подготвите за породувањето, како и што да правите и како да си помогнете кога ќе започне. На нив ќе бидете опкружени со трудници и парови кои се заинтересирани и се грижат за истите работи како вие. Можете, исто така, да се едуцирате поединечно преку вашите лекари, акушерки, вашата дула и други професионалци во таа област.

Препорака е едукацијата да ја започнете на почетокот на третото тримесечје од бременоста. Задолжително изберете предавања кои зборуваат за исхраната, вежбањето, промените во вашето тело за време на бременоста, како можете да си помогнете кога ќе започне породувањето, за вашето новороденче, помошта во деновите по породувањето, доењето и што ве очекува.

Вашето породување ќе започне со контракции, првично лесно, нерамномерно и речиси безболно. Како што породувањето напредува и зајакнува, контракциите ќе го засилат ритамот, интервалот помеѓу нив ќе станува сè пократок, а породувањето ќе станува поболно и подолго. За да ги олесниме работите, можеме да научиме техники за опуштање, како да се движиме, како да дишеме и што да правиме. Секогаш треба да имате на ум дека породувањето е непредвидливо. Во основа секој план пропаѓа по некое време.

Стравот ќе го намалиме со тоа што однапред ќе истражиме што ни носи породувањето и мајчинството, така што повеќе нема да се плашиме од ништо.

Следниот чекор е да изберете породилиште, да прашате за сите породилишта во вашиот град и, според вашите желби, да одредите кое најмногу ви одговара. Потоа, треба да изберете лекар кој ќе ја води вашата бременост од 36. недела до самото раѓање во избраната институција. Кој доктор и да го одберете, сигурно нема да згрешите. Собите и протоколите за породување во поединечните породилишта се разликуваат, но верувајте, во секое од нив ќе ве пречека високообразован кадар, медицинска опрема и сѐ што е потребно за породување. Одделенијата за акушерки се претежно дизајнирани во сите породилишта за новороденчињата да можат да бидат во близина на нивните мајки 24 часа на ден. Ќе останете во породилиште од три до пет дена ако сѐ биде добро.

За подобро да се подготвите за породување, ова се некои од ситуациите кои би можеле да ве загрижат: бидејќи секое породување е непредвидливо и различно, можеби најмногу се грижите дали ќе го препознаете породувањето. Вистинските контракции дефинитивно ќе ги препознаете, нема да застанат по некое време, туку ќе продолжат и со текот на времето ќе си го најдат својот ритам. Доколку сте сами и немате професионална придружба, најдобро е да одите во болница кога контракциите имаат постојан ритам и стануваат силни. Доколку забележите дека ви пукнал воденикот, односно дека плодната течност почнала да тече, подгответе се и полека упатете се кон болницата.

По пристигнувањето во болницата, ќе се сретнете со болничкиот персонал кој е тука за вас и вашето дете, бидете позитивни, прашајте сè што ве интересира во тој момент, бидејќи конечно дошол денот кога ќе станете родители. Вие и вашиот партнер не треба да се грижите за ништо, вие сте во безбедно опкружување, згрижени и подготвени.

Како да се опуштите? На трудниците им се советува да „вежбаат“ за да се релаксираат секој ден во текот на третото тримесечје. Седнете удобно, придушете ги светлата, пуштете тивка музика, запалете свеќа со етеричното масло по ваш избор, дишете и обидете се целосно да се опуштите. Она што сте го научиле ќе ви помогне полесно да се вратите во истата состојба кога ќе започне породувањето.

Кога ќе започне породувањето, можете да се опуштите со допир или масажа од страна на вашиот партнер или вашата дула. Ако вежбате и ги совладате техниките на фокусирана медитација, хипноза и слично, можете да си помогнете на тој начин. Вежбите за дишење ќе ги научите на курсеви и работилници за трудници, доколку сте упорни и ги практикувате за време на бременоста, а вашето дишење може многу да го скрати и олесни породувањето.

Поддршката за време на породувањето е многу важна, бидејќи има голем удел во породувањето, ќе ве води низ него, ќе ви дава ритам и ќе биде тука за вас секогаш кога ќе ви треба. Ако сте решиле дека тоа ќе ви биде партнерот, едуцирајте се заедно, ако партнерот не е спремен за толку сложена улога, не обвинувајте го, во комбинација со вашата дула, тој ќе знае што да прави, и може да ви се придружи во вистинско време, за да уживате во „златниот час“, заедно со вашето бебе.

И конечно, бидете позитивни, опкружени со луѓе на кои им верувате и подготвени за најубавиот настан во вашиот живот.

Автор: Сања Букач Штритоф/ дула

Извор