Можеби ви е тешко да гледате како вашиот тинејџер се однесува како полуден од љубов, но бидете трпеливи и имајте разбирање. Децата сметаат дека идејата за љубов е извонредна, фасцинантна, интригантна, а сепак клише. Непотребно е да се каже дека нивната идеја за љубов е многу различна од нашата како возрасни и никој не сака да го види своето дете скршено од болка или претворено во огорчен, разочаран циник.

За навистина да го решите проблемот, треба да бидете доволно трпеливи, добро да ја анализирате ситуацијата, за да можете да дадете конструктивен совет.

Развивањето силна врска со децата во текот на нивното детство и пред тинејџерските години им помага да ги постават темелите за блискост, да се чувствуваат удобно да разговараат со вас за сексот, запознавањето и врските. Кога ќе почнат да ги покажуваат овие интереси, вашиот придонес е суштински.

-Колку повеќе зборувате и колку сте поблиски, толку полесна ќе биде оваа дискусија во тинејџерските години – вели Стефани Краутхамер Јуинг, клинички психолог специјализиран за детска и адолесцентна психологија.

Кога мислите дека вашето дете е подготвено да почне да оди на состаноци, отворениот дијалог со него нуди можност да разговарате за тоа што ја сочинува здравата врска. Еве четири начини на кои можете да го научите вашиот тинејџер како да има добри односи уште од самиот почеток:

Разговарајте за запознавањето

Да речеме дека забележувате оти има некој на училиште што му се допаѓа на вашиот тинејџер. Започнете го разговорот прашувајќи дали некој од неговите врсници веќе се забавува на училиште на таков начин и дали некој му го привлекол вниманието. Бидете отворени, почитувајте ги сите мисли и чувства и бидете подготвени за сè што може да каже.

-Слушајте го вашето дете и дајте му до знаење дека не сте тука да судите или да давате совети на критички начин. Тоа не значи дека ќе се согласувате со сè што ќе каже, или дека сте во ред со сè што сака да прави, туку дека сте тука за да му помогнете да ги разбере своите чувства и светот околу него. Сакате да знае дека сте доверлива личност, дека го сакате и сакате да се грижите за него, дури и ако треба да зборувате за состаноци или врски, што значи дека секогаш може да дојде кај вас – вели д-р Јуинг.

Бидете пример

Вашето дете го следи секое ваше движење, па затоа е од суштинско значење да покажете здрави и среќни интеракции за да бидете одличен модел за него.

-Без разлика дали ве гледа во позитивна врска, со вашиот сопружник или партнер, пријатели или други членови на семејството, тој треба да види како изгледа здрава врска – вели д-р Јуинг.

Покажете му на вашиот тинејџер дека здравата врска е поврзана со доверба, искреност, комуникација, разбирање и слобода да бидете тоа што сте. Дозволете му на вашето дете да види како се однесувате кон вашите најблиски со сочувство, почит и љубезност. Ова го учи како треба да се однесува со другите и како другите треба да се однесуваат кон него. Од друга страна, објаснете му на вашиот син или ќерка дека недовербата, непочитувањето, манипулацијата, посесивноста или љубомората, омаловажувањето и насилството во која било форма се нездрави.

Помогнете му да воспостави граници

Вашиот тинејџер треба да знае дека е во ред да има љубов, но дека врската не треба да му го одзема целото време. Зборувајте за важноста од поставување граници за да не ги игнорира другите важни аспекти од неговиот живот – како пријателите, семејството, училиштето и воннаставните активности.

-Ако врската на детето станува премногу интензивна премногу брзо, седнете со него и кажете му дека сте загрижени за тоа колку време поминува со таа личност и дека забележувате оти занемарува некои други работи што му се важни – предлага д-р Јуинг.

Помогнете му да разбере дека нездравите, па дури и насилните врски може да започнат со љубомора.

Откако ќе го истакнете ова, помогнете му на вашиот тинејџер да постави граници. Ова може да биде излегување за време на викендите, оставање на неделата слободна за училишните и други активности, или поставување строго време кога треба да се врати дома. Објаснете му дека очекувате да се придржува до овие ограничувања или ќе има последици.

Исто така, задолжително разговарајте за сексот и објаснете му дека не треба да учествува во активности за кои не е подготвен. Научете го детето што значи согласност, како и кои се последиците што може да ги има сексуалниот однос на млада возраст – бременост, заразување со сексуално преносливи инфекции и чувство на искористување. Помогнете му да разбере дека здравите романтични врски не треба да станат физички интимни во оваа фаза од нивниот живот.

Побарајте предупредувачки знаци

Насилството меѓу тинејџерите е почесто отколку што мислат повеќето луѓе. Според Центрите за контрола и превенција на болести, приближно 10% од средношколките и 3-7% од средношколците пријавуваат дека доживеале некаков облик на насилство во врската.

Ако се сомневате дека вашиот тинејџер е под притисок или принуден да се вклучи во однесување во кое не сака да учествува, или е манипулиран, натеран да се чувствува лошо, физички или дигитално малтретиран од партнерот, разговарајте со него за тоа што се случува.

Д-р Јуинг, исто така, препорачува да се запознаете со љубовта на вашиот тинејџер.

-Треба да ја запознаете личноста со која вашиот тинејџер излегува, а таа треба да дојде во вашата куќа и да комуницира со вас. Тоа ви овозможува да дознаете која е таа личност и да видите како се одвива комуникацијата со вашето дете – заклучува д-р Јуинг.

Автор: Јасна Дреновац

Извор