Штотуку се породивте, бебето едвај има неколку недели, а сите сакаат да дојдат на гости за да го видат. Се слушате себеси како велите: „Да, се разбира дека може“, а всушност тоа е последното нешто што го сакате во моментот. И кога ќе дојдат, сите сакаат да го држат вашето бебе в раце. Можеби ви е доста од носењето на бебето и можеби сте уморни и сакате само да имате празни и слободни раце, но можеби не сакате другите да го држат вашето бебе в раце.

И навистина не е важно зошто. Можеби се плашите за безбедноста на бебето, можеби не сакате да ризикувате заразување со некој од вирусите, можеби… Воопшто не е важно. Важно е вие ​​да ги поставите правилата и да се почитува вашето мислење. Сепак, не е секогаш лесно да им го кажете тоа на оние што ви се блиски и сакаат да го видат вашето дете. А и кога ќе размислите колку сте опиени и самите со мирисот на вашето бебе… Сè ви е јасно. Еве како да се справите со таа ситуација или да не дозволите да се претвори во – ситуација.

Размислете за контекстот

Размислете на која личност би било во ред да ѝ го доверите држењето на бебето в раце и под кои околности. Можеби, на пример, е во ред блиските членови на семејството да го држат бебето, но ако им дадете до знаење дека треба да ги дезинфицираат рацете или да носат маска за лице.

Отворете се на вашите блиски пријатели и семејството

Ако сакате да поставите правила за блиското семејство, најдобро е да го направите тоа пред да се роди бебето, за однапред да се знаат очекувањата и правилата. Обидете се да не го правите тоа во моментот кога ќе се случи некој од блиските да го земе детето в раце, иако понекогаш тоа може да биде добра работа. Но, ако можете, направете го тоа порано за сите да се помират со правилата.

Подгответе се за она што ќе го кажете

Добро е однапред да подготвите теми за разговор со луѓето што доаѓаат да ве посетат. Бременоста и рутината со бебето, околу која сè се врти, може да придонесе во тие моменти да не знаете за што да разговарате. Подгответе изговор зошто бебето не е со вас, а потоа вклучете се во разговор со посетителите. „Извинете, но бебето штотуку легна да спие“ или „Едноставно не е вистинското време, можеби за неколку недели кога ќе воведеме некој ред, бебето ќе спие малку поредовно“, и „Ако го разбудам, тоа ќе биде тотален кошмар, извинете“.

Уверете ја личноста

Ако е сакана и блиска личност, уверете ја дека ви е многу важна и дека навистина сакате да се поврзе со бебето и дека ќе се погрижите тоа да се случи, но не во истиот момент. Можеби тие можат да го држат бебето, но не во моментот. Само треба да сте многу, многу јасни за границите и директно да ги кажете.

Подгответе изјава за луѓе што не ви се познати

Ако ви пријдат луѓе кои не ги познавате доволно и ви речат: „Ох, колку мило бебе, можам ли да го подржам?“, тогаш вашиот одговор може да биде многу вообичаена фраза како „Попрво би сакала јас да го држам бебето“ или „бебето се чувствува попријатно со мене“.

Не чувствувајте потреба да објаснувате

За кого и да се работи, родителите не треба да се чувствуваат како да мора да објаснуваат некому нешто. Во ред е да одредите граници и да се држите до нив, но со блиски членови на семејството тоа може да биде непријатно бидејќи се справувате со туѓите претпоставки и очекувања, а тие понекогаш може да бидат длабоко вкоренети и доста емотивни.

Користете носилка за бебиња

Носилката може да биде добар изговор! Тоа е дефинитивно измама со предумисла, но е вредна и не мора да се чувствувате виновни. На пример, ако го носите вашето бебе во носилка, луѓето многу поретко ќе ве замолуваат да го држат бебето в раце.

Автор: Наташа Крстичевиќ

Извор