Само затоа што имате исти родители не значи дека сте имале исто детство. Иако делите ДНК, не мора да го делите истиот поглед на светот, вредностите или животните приоритети. Конфликтите се природни, но понекогаш ескалираат во долгорочни расправии. Една студија покажала дека 28 % од луѓето барем еднаш доживеале прекин на односот со брат или сестра. И тоа често е една од најважните врски во животот, бидејќи браќата и сестрите се со нас уште од рана возраст.

-Во оваа врска постои постојана тензија меѓу браќата и сестрите, кои се наши најблиски сојузници и наши најголеми закани – вели психотерапевтот Али Рос од Британскиот совет за психотерапија.

Како да се справите кога тензиите достигнуваат врв или кога старите огорчености почнуваат сериозно да влијаат врз вашиот живот?

-Разговорите можат да бидат болни и тешки, особено ако никогаш порано не сте ги имале. Но, тие можат да отворат простор за нов начин на поврзување со браќата и сестрите. Понекогаш е ослободувачки да се каже што чувствуваат сите или да се разоткријат долгогодишните недоразбирања – додава Рос.

Но, понекогаш простувањето е невозможно, а најздравото нешто што треба да се направи е да се оддалечите. Подолу Рос објаснува како да препознаете и да се справите со пет од најчестите „тешки“ типови браќа и сестри.

Конкурентни браќа и сестри

Од друштвени игри до споредби на плати, конкуренцијата може да проникне во секој агол од вашата врска.

-Луѓето сакаат да ја контролираат сопствената приказна и идентитет, а семејните споредби честопати го поткопуваат тоа – вели Рос.

Што да направите?

Кога ќе почувствувате потреба да споредувате, препознајте дека тоа е рефлекс и пренасочете ја вашата енергија. Обидете се искрено да ја разберете перспективата на другата личност и вашата без да споредувате. Ова ја намалува желбата за ривалство.

Нарцисоидни браќа и сестри

Дали сакате подобра врска, но тоа изгледа невозможно? Тие не преземаат одговорност, не покажуваат емпатија?

-Наместо да ги етикетирате како нарцисоидни и да се обидувате да ги промените, покорисно е да разберете со што навистина се соочувате и како ќе се справите со тоа – вели Рос.

Што да направите?

Прашајте се искрено дали воопшто сакаат да ве разберат. Ако не, можеби е време повторно да размислите дали сакате да бидете во оваа врска.

Брат/сестра од типот „Петар Пан“

Другите се привлечени од нивниот „слободен дух“, но тие ви изгледаат како големо дете.

-Прашајте се зошто толку многу ве иритира, дали прерано сте презеле премногу одговорности? – вели Рос.

Што да направите?

Кажете отворено: „Ова е товар што го носам, а ти не ми помагаш“ и предложете конкретни промени.

Контролирачки брат/сестра

Ако се премногу авторитарни, тоа често произлегува од страв од ранливост.

Што да направите?

-Бидете свесни дека навредувањето само ја загрозува нивната контрола и може да реагираат уште побурно. Подобро е да излезете од нивната орбита и да им дозволите сами да сфатат – советува Рос.

Оттуѓен брат/сестра

Не се сите блиски. Можеби порано бевте блиски, но сега не знаете зошто сè тргнало наопаку.

-Пречесто брзаме со заклучоци, а потоа реагираме врз основа на тоа – вели Рос.

Може да има многу причини за повлекување, вклучувајќи трауми со кои тие не сакаат да се соочат.

Што да се прави?

Ако сакате да разговарате по години дистанца, кажете: „Жал ми е што немаме поблизок однос, би ми било драго тоа да се смени. Дали би сакал?“ Потоа оставете да одлучат дали и како ќе одговорат.

-Нашите браќа и сестри нè познаваат од годините на нашето формирање, во најинтимните контексти. Затоа односите со нив можат да бидат најдлабоки и најтешки. Но, со трпение, искреност и граници, можно е да се најде нов начин за поврзување или мирно разделување – заклучува Рос.

Извор