Бременоста и раното мајчинство често стереотипно се поврзуваат со заборавеност, позната како „мајчински мозок“. Но, ново истражување сугерира дека на долг рок овие искуства може да имаат и позитивна страна – тие може да бидат поврзани со подобро когнитивно здравје децении подоцна. Според студијата на Универзитетот во Калифорнија, Лос Анџелес (УКЛА), бременоста и доењето се поврзани со подобра когнитивна функција кај жените во постменопауза.

Истражувањето опфатило повеќе од 7.000 жени

Истражувањето предводено од професорката по антропологија Моли Фокс покажало дека бременоста и доењето се поврзани со подобри когнитивни функции и вербална и визуелна меморија во подоцнежниот живот. Научниците анализирале податоци од повеќе од 7.000 жени во нивните 70-ти години, кои учествувале во две големи студии за меморијата и когнитивното стареење. Учесниците биле подложени на годишни когнитивни процени во период од 13 години, а исто така пополниле и детални прашалници за нивната репродуктивна историја.

Жените се непропорционално погодени од Алцхајмеровата болест, а оваа разлика не може целосно да се објасни со нивниот подолг животен век. Професорката Фокс и нејзините колеги затоа сакале да видат дали репродуктивната историја – сè уште недоволно проучен фактор во стареењето на мозокот – може барем делумно да помогне во објаснувањето на овој јаз.

Бременоста и доењето се поврзани со подобра меморија

Резултатите ја потврдиле почетната хипотеза. Жените што биле бремени во просек 3 пати постигнале околу 0,31 % подобри резултати на тестовите за општа когнитивна способност, за разлика од жените што никогаш не биле бремени. Просечно 11,6 месеци доење во текот на животот било поврзано со околу 0,12 % подобри резултати на овие тестови.

Секој дополнителен месец од бременоста бил поврзан со зголемување од 0,01 поен во вкупната когнитивна способност, а секој дополнителен месец доење покажал сличен тренд, со зголемување од 0,02 поени во вербалната и визуелната меморија. Бројките не се огромни, но се споредливи со ефектите на некои познати заштитни фактори, како што се непушењето и одржувањето високо ниво на физичка активност.

Генерално, жените што биле бремени постигнале просечно 0,60 поени повеќе во мерките за когнитивни способности од оние што не биле, додека жените што доеле постигнале 0,19 поени повеќе во општите когнитивни резултати и 0,27 поени повеќе во вербалната меморија од оние што никогаш не доеле.

Биологијата не е единственото објаснување

Истражувачите предупредуваат дека биологијата можеби не е единствената причина. На пример, имањето повеќе возрасни деца може да значи посилна социјална поддршка, пониски нивоа на стрес или поздрави навики во начинот на живот, од кои сите можат да имаат корист за здравјето на мозокот.

-Ако, како следен чекор, можеме да откриеме зошто овие репродуктивни модели водат до подобри когнитивни резултати во староста, тогаш можеме да работиме на дизајнирање терапии – како што се нови или пренаменети лекови или социјални програми кои го имитираат природниот ефект што го забележавме – смета Фокс.

Наодите ги ставаат бременоста и доењето во центарот на вниманието како претходно занемарен фактор во когнитивното стареење и отвораат нови патишта за истражување на здравјето на мозокот кај жените, во текот на целиот животен век.

Извор