Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Од една страна, се радувам што конечно најдов место каде да се обратам, од друга страна, се прашувам себеси каква мајка сум јас! Од првиот брак, кој траеше околу 7 години, имам ќерка која наполни 13 години. До пред една-две години постојано бев со неа, секаде заедно, секогаш имав разбирање за неа, сама ја носев на одмор, речиси сама ја чував, таа беше нешто без кое не можев да функционирам, нејзината прегратка беше лек за мене. Нејзиниот татко длабоко навлезе во проблеми со дрога. Не знам колку пати пробав да му помогнам, не одеше ниту со добро ниту со лошо. По бесконечно лажење, крадење, искористување, нашиот брак се распадна. Во моментот кога се преселив, го зедов и моето дете со себе! Ѝ посакувам сè најдобро на овој свет, но јас веќе немам потреба да ја гушкам, повеќе време трошам да ја искритикувам или да ја искарам… Тоа страшно ме вознемирува, дури и кога ќе ми се приближи, јас сакам да се тргнам! Се плашам дека ако не си помогнам, таа ќе се оддалечи од мене!

Прашува: читателка

ОДГОВОР: Драга мајка, изминативе години сте воделе битка чија цел се нарекува: „Ќе го спасам и заштитам моето дете“. Таквите битки се интензивни, истрошувачки, траат и траат. Таквите битки се животни процеси за кои е потребно време бидејќи времето носи и нов стадиум низ кој поминуваме. Имавте потреба да му надополните сè на вашето дете. Вашата цел е остварена и вашето дете е заштитено, безбедно и сигурно. Во овој животен процес вие целосно се посветивте на вашата ќерка, и физички и психички. Дадовте сè од себе и повеќе од тоа. Дадовте сè што може да се даде, сета љубов и сето внимание на светот само за вашата ќерка. Нејзиното постоење беше ваша духовна храна. Таквата врска го олеснила процесот на адаптација кон нов животен распоред, но можеби го отежнила процесот на реорганизација и поставување нови животни врски и начела, а со тоа го блокирала вашиот контакт со себе.

Бевте водач на еден истрошувачки животен процес, нормално е да постојат разни емотивни состојби кои ќе поминуваат низ вас. Вие сте психо-биолошко суштество и имате своја хиерархија на мотиви, во вас постојат потреби кои чекаат да бидат задоволени и ако не се задоволат или не се постигнат посакуваните мотиви, личноста развива фрустратибилен однос најчесто кон оној или она нешто што го смета како препрека во остварувањето на сето она што е длабоко во себе или длабоко во своето несвесно посакувано, но истовремено и незадоволено. Ве охрабрувам да не трчате во овој маратон сама. Земете некој мудар со себе. Советувајте се со стручно лице кое ќе ви биде ваш патоказ. Убаво е тоа што сте се слушнале себеси. Тоа ви отвора можност да се насочите кон себе и да стапите во контакт со себе. Таму се наоѓа вашата себегрижа, себепочит, себељубов. Дотогаш јас ве прогласувам за МАЈКА-СУПЕРХЕРОЈ .

Одговара: Христина Стефановска, психолог за деца и адолесценти, Здружение „Хармоничен свет”

е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.