Истражувањето на Државниот универзитет во Пенсилванија покажало дека нивото на социјални вештини во градинка може да биде поврзано со подоцнежниот успех во училиште, на работа и во животот. Научниците следеле околу 700 учесници во период од 20 години, главно од социо-економски загрозени средини. Во истражувањето биле земени предвид и фактори како сиромаштија, стрес, ниво на читање во градинка, агресивност, раса и животната средина во која децата растеле.

Додека посетувале градинка, наставниците ги оценувале социјалните компетенции на децата на скала од пет степени преку осум категории, како што се споделување со другите и помагање на другите. Резултатите покажале дека секоја дополнителна точка ги удвојувала шансите за завршување на средното образование и ја зголемувала за 46 отсто веројатноста за постојано вработување до 25. година. Од друга страна, секоја точка помалку го зголемувала ризикот од апсење за 67 отсто и веројатноста за користење социјални услуги за 82 отсто.

Однесувањето во градинка не го одредува детето

Учесниците повторно биле оценети во раните дваесетти години, а нивните образовни успеси, вработување и казнени досиеја биле споредени со резултатите од детството. Се покажало дека лицата со подобро развиени социјални вештини во градинка почесто дипломирале, биле стабилно вработени и поретко имале проблеми со законот.

Сепак, постариот истражувач Дејмон Џонс нагласил дека истражувањето не докажува директна причинско-последична врска.

– Но, во комбинација со други истражувања, јасно е дека помагањето на децата во развојот на овие вештини ја зголемува нивната шанса за успех во училиште, работа и живот – рекол Џонс.

Тој додал и дека социјалните и емоционалните вештини можат да се развиваат и подоцна, и дека однесувањето во градинка не ја одредува трајно иднината на едно дете.

Извор