Во текот на деветте месеци од бременоста мајките внимателно ја избираат храната што ја јадат, избегнувајќи сувомесни производи, виршли и непастеризирано сирење за да го одржат своето бебе безбедно и здраво. Секако, сега кога вашето бебе е со вас, вашите заштитни инстинкти се зголемени, па нормално е да се запрашате дали има некоја храна што треба да ја избегнувате додека доите. На крајот на краиштата, молекулите од храната што ја јадете можат да поминат низ мајчиното млеко и да влезат во системот на вашето бебе.

Сепак, навистина не постои строга листа со храна што треба да ја избегнувате додека доите.

-Навистина не постои храна која секоја доилка треба целосно да ја избегнува. Повеќето мајки што дојат можат да продолжат да ја јадат храната што вообичаено ја јадат. Овде е важна умереноста, како и во секое друго време од животот. Добро балансирана исхрана е важна за вие и вашето бебе да се чувствувате најдобро – вели Линдзи Шипли, едукатор за породување и консултант за лактација.

Иако не постои строга листа со храна што треба да се избегнува, има неколку работи што треба да ги намалите додека доите за да го одржите нивото на производство на млеко и да се осигурите дека вашето бебе е среќно и здраво.

Која храна треба да биде ограничена?

Мајките што дојат не треба да се грижат премногу за тоа дали се хранат доволно здраво, важно е да се свесни за храната која доколку се консумира во големи количини, може да влијае врз здравјето на детето и количината на млеко.

Алкохол

По девет месеци воздржување од алкохолни пијалаци, веројатно сакате да испиете чаша пиво или вино, и тоа е сосема во ред. Само имајте на ум дека алкохолот може да помине преку мајчиното млеко во системот на вашето бебе.

Ако сте испиле уште малку, почекајте алкохолот да го напушти телото пред да доите. Кога вашата крв е без алкохол, исто ќе биде и вашето млеко.

Генерално е безбедно да се пие по еден алкохолен пијалак (150 мл вино), според Американската академија за педијатрија (ААП). Организацијата препорачува да се испие пијалак по доењето, доколку е можно, а потоа да се чека два часа пред следното хранење за да му се даде време на вашето тело да го исчисти алкохолот.

Сепак, имајте предвид дека овие упатства се општи.

Кофеин

Ако ви треба мала помош при будењето, имаме добри вести: доењето и кафето можат да одат заедно. Кофеинот е во ред да се консумира додека доите во умерени дози. Сè додека го ограничите внесот на кофеин на не повеќе од три шолји дневно (околу 300 милиграми кофеин), вие и вашето бебе ќе бидете во ред.

Некои експерти истакнуваат дека е добра идеја да уживате во кафе или чај по доењето. До моментот кога вашето бебе треба да е следно нахрането, кофеинот треба да исчезне од вашиот систем. Сепак, Пелусо и О’Конор повторуваат колку е важно да го слушате вашето тело и вашето бебе бидејќи секој различно реагира на кофеинот.

Што се однесува до консумирањето чоколадо и доењето, не треба да се грижите.

-Чоколадото има многу малку кофеин, па затоа треба да се чувствувате удобно уживајќи во чоколада – вели Тамара Хокинс, консултант за лактација и поранешен претседател на Њујоршката асоцијација на консултанти за лактација.

Риба

Речиси сите видови риби содржат жива, вообичаен загадувач кој е познат невротоксин, што значи дека може да влијае врз мозокот на бебињата. Но, најчесто, здравствените придобивки од јадењето риба (богата со протеини, малку масти) ги надминуваат ризиците.

-Поточно, омега-3 масните киселини и витаминот Д се неопходни за развојот на доенчињата – вели Пелусо.

-Ако мајката има урамнотежена исхрана и редовно јаде други извори на протеини, содржината на жива можеби не е нешто за што треба да се грижи – вели таа.

Нане, магдонос и жалфија

Овие три билки се познати како антигалактогоги (галактогозите се супстанции кои ја поттикнуваат лактацијата или производството на млеко), што значи дека во големи дози можат да го намалат производството на млеко.

-Има одредена вистина во тоа, но би требало да внесете толку многу жалфија што би морале да јадете сендвич со жалфија. Сендвич од мисирка зачинет со жалфија или шолја чај од нане нема да ви го намали снабдувањето со мајчино млеко – вели Хокинс.

Ако барате алтернатива за чајот од нане, О’Конор ја препорачува камилицата.

Дали треба да избегнувате интензивни вкусови додека доите?

Можеби сте слушнале дека храната со интензивен вкус, како што се лукот или зачинетата храна, се меѓу намирниците што треба да ги избегнувате додека доите, но не постојат строги правила за вкусовите во кои можете да уживате. На крајот на краиштата, како ќе ја зачините вашата храна, во голема мера зависи од вашата култура на готвење. Во некои култури мајката што дои јаде јадење со лук или многу зачинето јадење, а бебето е сосема добро.

Всушност, изложувањето на вашето бебе на различни вкусови може да го направи поотворено да проба различни вкусови подоцна.

Дали треба да избегнувате потенцијални алергени на храна додека доите?

Ако сте имале проблеми со гасови за време на бременоста, вашиот лекар можеби ви предложил да се држите подалеку од одредени видови храна за кои е познато дека предизвикуваат гасови, како што се грав, карфиол и зелка. Затоа, многу мајки логично се прашуваат каква храна да избегнуваат кога дојат. Вистината е дека храната може да предизвика гасови кај бебињата само ако тие се особено чувствителни на тоа.

Кога бебето има чувствителност на храна или алергија, молекулите од што и да јаде мајката се пробиваат низ мајчиното млеко во дигестивниот систем на бебето, каде што ја иритираат цревната обвивка и предизвикуваат болка, објаснува Хокинс. Се разбира, чувствителноста на храна е специфична за секое дете, но има некои намирници што се вообичаени предизвикувачи:

-Млечни производи
-Соја
-Глутен
-Јајца
-Кикиритки и јаткасти плодови
-Риба
-Цитрус.

-Најдобар начин да откриете дали бебето е чувствително е да го изложите на различна храна – вели Симс-Браун.

Значи, како да знаете дали вашето дете навистина има чувствителност на храна? Бебињата обично развиваат симптоми во рок од 12 до 24 часа по јадење, кои вклучуваат:

-Гасови
-Плачење и колика (грчеви)
-Дијареја
-Крвава и мукозна столица
-Исип
-Егзема
-Прекумерно плукање или повраќање
-Застој, течење на носот, отежнато дишење или кашлање
-Проблеми со спиењето.

-Доколку бебето ги покажува овие симптоми, постои голема веројатност дека постои семејна историја на алергии. Кравјото млеко е најчестиот алерген за бебињата и се чини дека е поверојатно да предизвика проблеми кај бебињата што се хранат со вештачко млеко во првите неколку дена од животот.

Ако се сомневате дека вашето бебе реагира на нешто што сте јаделе, следниот чекор е целосно да ја исфрлите таа храна од вашата исхрана две до три недели, за да видите дали тоа прави разлика.

Запомнете: освен ако одредена храна не е идентификувана како проблем за вашето дете, не постои строга листа со храна што треба да се избегнува додека доите.

Автор: Ана Дукиќ

Извор