Наместо да го задоволуваат гладот на децата на игралиштето со нездрави грицки во текот на летните месеци додека нивните родители не се вратат од работа, градските власти во Хелсинки носат бесплатни, топли, здрави оброци во парковите за сите помлади од 16 години, во периодот од јуни до август. И ова не е ништо ново, тоа го прават веќе 80 години.
Токму кога мислите дека Скандинавија повеќе не може пријатно да ве изненади со различните одржливи мерки, проекти и закони, повторно воодушевува.
Можеби не сте знаеле, но во главниот град на Финска традиционално веќе 80 години од јуни до август во детските игралишта и паркови децата имаат право на бесплатен топол и здрав оброк додека си играат. Оваа јавна дистрибуција на храна започнала во 1942 година во средината на војната, кога недостигот на храна ги мачел повеќето луѓе во Хелсинки. Градот сакал да им понуди на децата барем еден топол оброк дневно, но традицијата продолжила до денес во текот на летото кога овие оброци на игралиштето продолжуваат да им го олеснуваат животот на семејствата.
Правилото е многу едноставно. Право на храна имаат сите помлади од 16 години, а сѐ што треба да направат е да носат празни садови и прибор од дома. Оброците се служат напладне, секој работен ден, на приближно 40 игралишта низ Хелсинки, а само едно игралиште храни меѓу 100 и 200 деца дневно. Така децата можат да уживаат безгрижно на јавните игралишта за време на летниот распуст, а наместо брза и нездрава храна, тие јадат топол и здрав оброк додека нивните родители се на работа. Грижа се води и околу менито за оброци, па приоритет им се дава на здравите и хранливи оброци, вклучувајќи ја и топлата супа од лосос.
– Оваа година менито вклучува повеќе традиционални секојдневни јадења и храна погодна за вегетаријанци и вегани, сето тоа според преференциите на корисниците на услугите – пишува на веб-страницата на градот.
Целиот проект се заснова на филозофијата за нула отпад, односно нема остатоци од храна, ниту непотребни амбалажи бидејќи сѐ е спакувано во садови за повеќекратна употреба и прибор донесен од дома, кои подоцна се мијат и се подготвени за повторна употреба. Многумина би рекле дека ова е проект наменет само за деца кои потекнуваат од семејства со ниски приходи, но би се изненадиле, храната е достапна за секој, без разлика на богатството, а целта е да се избегне внесувањето нездрава храна во организмот на детето. Вистински пример за добра практика.
912