Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Имам ќерка од 5 години, родена нормално и сѐ се одвиваше нормално, но имаше еден период кога беше долго пред телефон и гледаше некои неубави и страшни сцени. Оттогаш се смени 100%, ниту говорот ѝ беше како што треба, ниту однесувањето. Не сакаше да си игра и да јаде… Како еден вид депресија, од собата не излегуваше. Јас веднаш реагирав и исклучивме екрани дома, ја запишав во градинка, ние живееме во село, па ја запишав во најблискиот град. Сега е подобра и во однос на однесувањето и во однос на зборувањето… Бевме на логопед, но ни рече дека морала да биде барем 2-3 месеци во градинка, па потоа да почне да работи со неа. Ако може уште некој совет, би била благодарна.

ОДГОВОР: Многу е веројатно дека дете од рана предучилишна возраст кое ќе види страшни сцени на интернет да реагира на специфичен својствен начин. Она што ги инхибирало и ослабнало нејзините психолошки сили е сцената која се случувала во ситуацијата што ја погледнала.

Треба да се проанализира за што всушност е исплашено детето, дали се идентификувало со нешто или пак ја изгубило својата сигурност и безбедност креирајќи нереални и катастрофични мисли во својот ум. Исто така, можам да забележам дека последната страшна случка само го влошила нејзиниот веќе разнишан личносен систем од долготрајната употреба на екран. Потребна е индивидуална работа со стручно лице каде што детето ќе ги врати здравите мисли и уверувања.

Одговара: Христина Стефановска, психолог за деца и адолесценти, Здружение „Хармоничен свет”

е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.