Родителите се соочуваат со многу предизвици во процесот на воспитување на децата. Некои родителски стратегии и избори може да имаат долгорочни последици врз развојот и благосостојбата на децата. Психологот Ирина Красинскаја открива кои се најмалку конструктивните стратегии за родителство, односно кои грешки ги прават родителите.

Првата работа на списокот е споредбата со другите деца.

-Кога станува збор за споредба со другите деца, важно е да се запамети дека секое дете е уникатно и се развива со свое темпо. Споредувањето може да доведе до стрес, намалена мотивација за учење, развој на анксиозни нарушувања и формирање ниска самодоверба. Наместо тоа, почитувајте ги, поддржете ги и охрабрете ги напорите на детето и давајте формативен фидбек.

Според психологот, неконзистентното однесување на возрасните може да доведе до збунетост и стрес кај децата.

-Важно е да се создаде стабилна и предвидлива средина, јасни и предвидливи правила. Обидете се да бидете доследни во вашите одлуки и реакции. Помогнете му на вашето дете да ги подобри вештините за планирање и саморегулација. Научете го на стратегии за управување со стресот и приспособување на промените – додала таа.

Третата грешка е немањето комуникација и ретките прегратки.

-Емоционалната поддршка, комуникацијата и физичкиот контакт играат важна улога во развојот на детето. Обидете се да создадете топла и поддржувачка средина, која ќе придонесе за неговата емоционална и психолошка благосостојба. Одредете посебно време за комуникација со детето. Ова ќе помогне детето да се чувствува разбрано и ценето – советува Красинскаја.

Четвртата грешка е пристрасен однос кон активностите на детето.

-Кога возрасните имаат пристрасен став кон интересите на детето, тоа го ограничува неговиот развој, самоизразувањето и ја намалува неговата самодоверба. Обидете се да создадете стимулативна средина во која детето ќе се чувствува препознаено и ценето, без оглед на неговите преференции – препорачува психологот.

Родителите не треба да ја игнорираат важноста на одморот и слободното време.

-Не заборавајте дека одморот и слободното време играат важна улога во развојот и благосостојбата на детето. Помогнете му да научи да го цени и да го организира своето време за да донесе радост, корист и емоционално задоволство – истакнува експертот.

На крајот, големата грешка е одбивањето и физичкото казнување. Според психологот, тоа во никој случај не треба да бидат алатки што ги користиме во воспитувањето.

-Ваквите методи можат да доведат до сериозни психолошки проблеми, како што се ниска самодоверба, анксиозност, агресија. Тие не придонесуваат за здрав ментален развој на детето и можат да предизвикаат непоправлива штета на неговата емоционална и физичка благосостојба – заклучува психолог.

Извор