Празниците традиционално се време за семејни собири, но многумина припадници на генерацијата З оваа година не се радуваат на таквите средби. Причината не е љубовниот живот, туку кариерата. Истражувањето покажало дека дел од младите се плашат од средби со семејството затоа што лажеле за својата работа и не сакаат да одговараат на прашања за кариерата.

Платформата „Елвир“, која нуди обуки од бизнис-светот, спровела анкета меѓу 2.000 лица на возраст од 21 до 35 години. Резултатите покажале дека 58 отсто од испитаниците признале дека на некој начин лажеле за својата кариера пред семејството.

Меѓу помладите припадници на генерацијата З 42 отсто изјавиле дека чувствуваат барем умерен стрес кога на семејните собири се отвора разговор за работа, а 33 отсто дури го прескокнале семејниот собир за да избегнат такви прашања.

Желбата за семејно прифаќање останува силна

Разговорите за работа станале посебно чувствителни бидејќи темите во семејството со текот на времето се менуваат.

Истражувањето на истражувачкиот центар „Пју“ покажало дека само 51 отсто од луѓето на возраст од 18 до 34 години сакаат да имаат деца, што го префрла фокусот повеќе на кариерата. Во исто време, „Кенгејџ груп“ наведува дека само 30 отсто од дипломираните студенти во 2025 година нашле постојана работа поврзана со својата струка.

И покрај несигурноста на пазарот на труд, припадниците на генерацијата З сè уште бараат одобрување од семејството. Истражувањето на „Елвир“ покажало дека 45 отсто од испитаниците чувствуваат притисок да ја сменат работата поради мислењето на роднините, додека 22 отсто се подготвени да се откажат од работата од соништата за да му се допаднат повеќе на семејството.

Иако вредностите и животните патишта се различни од порано, желбата за семејно прифаќање останува силна.

Извор