Сакаме да ги научиме децата на одредени работи и сè што правиме, сè што кажуваме најчесто е во согласност со одредени идеи што ги имаме за тоа што сакаме да ги научиме децата. Им ја кажуваме вистината, секако, даваме примери и покажуваме како се доаѓа до тоа што сакаме да го прикажеме. Некогаш даваме и обратни примери – како не сме го следеле она што требало, па сè излегло поинаку. Но, факт е дека понекогаш, само малку – лажеме.

Ова не се големи, лоши лаги, туку лаги кои ни помагаат да го зајакнеме и утврдиме она што сакаме нашето дете да го усвои како резултат на нашите напори. Важната лекција што сакаме да ја пренесеме е дека сè може да се постигне со доволно труд. Во оваа смисла, ние често едноставно ја игнорираме среќата. Но, Ентони Меки, ѕвездата на филмот „Капетан Америка: Храбар нов свет“, смета дека тоа не е точно.

Тој во едно неодамнешно интервју рекол:

-Ги лажеме нашите деца. Им кажуваме дека ако се добри и добијат добри оценки и се трудат повеќе, ќе станат успешни. Ако работите доволно напорно, вашата напорна работа ќе се исплати. И тоа не е точно во многу случаи, успехот се дава, а не се заработува – истакнал Меки.

Меки беше актер повеќе од 10 години пред да ја добие неговата најуспешна улога – Сем Вилсон, познат како Капетан Америка, во филмот од 2014 година „Капетан Америка: Зимскиот војник“. Дотогаш, тој се борел да успее, откако дипломирал на престижното училиште „Џулијард“, но никогаш не можел да добие големи, важни улоги во Холивуд. За време на ова интервју Меки изјавил дека проценил оти „оставил 10.750 часа обука“ пред да ја прифати работата што му го променила животот. И тој не само што седел и чекал улогата да го најде, туку активно се обидел да влијае врз судбината: им пишувал писма на директорите на студиото „Дизни Марвел“ со надеж дека ќе добие улога во еден од популарните филмови за суперхерои. Овие писма не вродиле со плод, но му дале можност да се сретне со режисери кои му понудиле улога во филм за кој не можеле да откријат премногу детали. Не му кажале која улога ќе ја игра, ниту кој ќе глуми покрај него.

Но, тој се согласил затоа што му се допаѓале режисерите и затоа што верувал дека Марвел е вистинскиот избор за него. Значи, работата и упорноста се исплатат, но среќата дефинитивно игра важна улога.

Така, среќата на Меки му помогнала да стане главен лик во филмот што го чекал – долго време.

-Кога ви се дава таква голема можност, треба да размислите дека може да не успеете – рекол Меки и признал дека на почетокот бил исплашен, но не дозволил тоа да го спречи.

Имал ментори и луѓе околу него кои можеле да му помогнат, па сфатил:

-Морав да се потпрам на тие учители и луѓе околу мене кои ме доведоа до таа точка.

Инаку, актерот има четири сина со поранешната сопруга Шелета Чапитал – кои се на возраст од 8 до 15 години, но тој ги држи подалеку од очите на јавноста. Кога не работи, Меки поминува време со своите деца во нивниот дом во Њу Орлеанс.

-Мојата прва работа, мојата најважна работа, е едноставно да бидам добар татко. Да бидам татко како татко ми. Мојата работа не е важен дел од тоа – заклучил тој.

Автор: Наташа Крстичевиќ

Извор