Играта на отворено не е само забава, туку е од суштинско значење за здрав развој на детето. Експертите велат дека играта на отворено помага во зајакнување на мускулите, координацијата, социјалните вештини, креативноста и менталното здравје. Додека модерниот живот и технологијата често го ограничуваат времето поминато на отворено, постојат многу едноставни начини да им се обезбедат на децата безбедни, забавни и незаборавни искуства со игра на отворено. Децата поминуваат сè помалку време на отворено, што може да влијае врз нивното физичко, когнитивно и социо-емоционално здравје.

Недостиг на игра на отворено кај децата

Според д-р Трејси С. Вилијамс, клинички психолог, децата денес сè повеќе страдаат од она што се нарекува „дефицит на игра на отворено“. Недостигот на време поминато на отворено може да ги ограничи движењето, моторните вештини и социјалната интеракција.

-Одењето, трчањето, скокањето и качувањето ги зајакнуваат мускулите, а ги подобруваат просторната перцепција, рамнотежата и координацијата. Децата, исто така, добиваат витамин Д од сонцето, кој е важен за здравјето на коските и расположението. А гледањето во далечината додека се на отворено го намалува напрегањето на очите. Децата што поминуваат барем еден час на отворено дневно можат да го намалат ризикот од развој на кратковидост за повеќе од 14 проценти – вели д-р Вилијамс.

Когнитивните придобивки се исто така значајни. Карина Линч од „Брејн поп“ истакнува дека времето поминато во природа ги опушта децата, го намалува стресот, помага за расположението и ја зголемува концентрацијата. Играта на отворено ги поттикнува љубопитноста, вештините за набљудување и креативноста. Социо-емоционалниот развој се зајакнува и преку игра со други деца. Кара Гудвин, доктор на науки, нагласува дека отворената и креативна игра ги поттикнува соработката, комуникацијата и учењето како да се справите со победата и поразот.

Како да се поттикне игра на отворено

Експертите препорачуваат децата да поминуваат најмалку 30 минути на ден на отворено. Ако тоа е предизвик, едноставно вклучете ја играта во вашата рутина: прошетки, возење велосипед или заеднички активности во вашиот двор или во блискиот парк.

-Во текот на викендите посветете неколку часа на игра на отворено. Планирајте едноставни активности како прошетки, пешачење, пикници или играње на блиските игралишта – препорачува д-р Вилијамс.

Џин Бенет од „Колумбија плеј проџект“ ја нагласува важноста на ограничувањето на времето поминато пред екран и вклучувањето на родителите во играта.

-Додека вашите деца играат, немојте да зборувате на телефон – придружете им се во играта.

Совети за урбани средини

Дури и во урбани средини, каде што просторот е ограничен, децата можат да поминуваат време на отворено. Експертите препорачуваат: играње криенка, барање предмети во паркот, посета на локални игралишта, прошетки во природа, посета на зоолошка градина или детски музеј.

Самостојна и водена игра

Важно е децата да имаат можност за самостојна и водена игра на отворено. Гудвин и д-р Вилијамс објаснуваат дека таквата игра ја развива способноста за регулирање на однесувањето и емоциите, решавање проблеми и самостојното барање радост. Децата учат преку истражување, качување по карпи, играње по трева, вода, со стапчиња и други природни материјали.

Играта на отворено им користи и на родителите

Играта на отворено им помага на родителите да се релаксираат и да бидат присутни со своите деца.

-Нè оддалечува од нашите одговорности, лаптопи и домашни обврски, а истовремено го подобрува и семејното поврзување – вели д-р Вилијамс.

Идеи за игра на отворено

Експертите препорачуваат различни активности кои поттикнуваат движење, креативност и истражување:

-Криенка, лов на богатство, игри со топка;
-Возење велосипед, возење ролерки, скокање со јаже;
-Качување по дрвја, цртање со креда, летање змејови;
-Истражување на природата, собирање лисја, гранчиња и семиња за креативни проекти;
-Пикници, игри со вода, балони, меурчиња, игри со снег.

Дури и едноставни активности како цртање на табла, градење тунели од природни материјали или правење мини градови на отворено поттикнуваат креативност и независно размислување. Играта на отворено не е луксуз, таа е клучен дел од здравиот развој на детето. Експертите се согласуваат дека колку повеќе простор, време и можности им даваме на децата да играат, толку поголеми ќе бидат нивните вештини, здравје и среќа.

Извор