Навикнати сме да гледаме фотографии од бебиња кои изгледаат совршено, па кога ќе видиме дека кожата на нашето бебе не е толку совршена, т.е. дека има акни, навистина не ни е сеедно. Ако и вие сте во таа ситуација, не грижете се и знајте дека тоа е сосема нормално и привремено, и дека овие мали мозолчиња ќе исчезнат од лицето на бебето.

Причини за акни кај бебињата

Се прашувате од каде доаѓаат акните кај бебињата? Тие обично се предизвикани од изложеност на мајчините хормони – особено андрогени – во матката. Овие хормони можат да ги стимулираат лојните жлезди на бебето, што доведува до појава на акни неколку недели по раѓањето. Ова хормонално влијание може да продолжи за време на доењето или дури и за време на хранењето со адаптирано млеко, во зависност од чувствителноста на бебето.

Поретко, акните кај бебињата можат да бидат предизвикани од надворешни иританти како што се некои детергенти за перење, груби ткаенини или производи за нега на кожата, кои не се формулирани за новороденчиња. Понекогаш причината е само развојот на имунолошкиот систем на бебето кој се приспособува на надворешниот свет.

Кога се појавуваат акните кај бебињата?

Кај повеќето бебиња акните се појавуваат помеѓу две и четири недели возраст, иако некогаш може да се појават порано или подоцна. За разлика од егзема (која често е сува и предизвикува чешање) или исип од топлина (кој обично се појавува во кожните набори), акните кај бебињата обично се појавуваат како мали црвени или бели испупчени делови на образите, челото или брадата.

Кога исчезнуваат

Добрата вест е дека акните на кожата на бебето се само привремени и во повеќето случаи ќе исчезнат во рок од неколку недели или месеци. Најчесто бебето нема да ги има до третиот месец од животот.

Нега на кожата на бебето

Не постои (безбеден) начин да се ослободите од акните на лицето на бебето, но она што сигурно може да помогне е нежна грижа за кожата на бебето, што значи секојдневно миење на лицето со топла вода и бебешки сапун кој нема додадени мириси. Никогаш не треба грубо да ја триете кожата на лицето на вашето бебе или да ги чепкате мозолчињата, колку и да сте во искушение да го направите тоа.

Исто така, кремовите и препаратите за акни наменети за тинејџери и возрасни не се безбедни за деликатната кожа на бебето. Наместо тоа, дозволете неговата кожа да дише и прескокнете ги сите лосиони, масла или кремови освен ако не ви ги препорача вашиот педијатар.

Во повеќето случаи, акните кај бебињата ќе исчезнат сами од себе, но треба да го посетите вашиот педијатар ако мозолчињата изгледаат особено воспалени, брзо се шират или изгледаат инфицирани. Исто така, побарајте стручен совет ако акните продолжат по неколку месеци или се шират на други делови од телото.

Конечно, имајте на ум дека кожата на бебето поминува низ многу промени, а појавата на акни не укажува на лоша хигиена или нешто слично. Тоа е само очекувана и нормална фаза во првите месеци, која брзо ќе помине.

Автор: Наташа Златковиќ

Извор