Како што знае секоја мајка, породувањето може да биде многу напорно за телото. Целиот процес врши притисок врз карличната област, вклучувајќи ги нервите и мускулите. Кај некои жени, ова може да резултира со постпородилна инконтиненција, што вклучува неволно мокрење. Според новото истражување на „Ерфло уролоџи“, 85 отсто од новите мајки доживуваат често истекување на урина. Сепак, само 15 отсто од нив ги добиваат потребните ресурси или грижа за да им се помогне да управуваат со симптомите на инконтиненција. Експертите предупредуваат дека недостигот на соодветна помош може да доведе до посериозни компликации, како што се инфекции на уринарниот тракт (ИУТ) или вагинални инфекции, како и зголемување на проблемите со менталното здравје, како што е постпородилната депресија.

Зошто не се зборува за ова?

-Една од причините зошто многу жени не бараат помош за постпородилна инконтиненција е претпоставката дека тоа е „нормално“, иако не е нужно така – објаснува Алис Фоснајт, овластен лекар-асистент специјализиран за женско здравје.

Исто така, стигмата поврзана со зборувањето за инконтиненција може да ги обесхрабри жените да зборуваат за тоа.

-Во Соединетите Држави рутинската постпородилна нега традиционално се фокусира на шестнеделниот преглед, кој во голема мера се однесува на крвавењето, постпородилното закрепнување и контрацепцијата, наместо долгорочното здравје на карлицата – вели Фоснајт.

Според неа, не постои универзален протокол за дијагностицирање на постпородилната инконтиненција, па затоа многу лекари не поставуваат прашања за симптомите, освен ако пациентот не го спомене тоа. Сепак, исклучително е важно да се препознае и разбие стигмата околу оваа тема.

-Посакувам да има поотворени разговори за постпородилна инконтиненција, со вистинска поддршка – без разлика дали станува збор за пристап до терапија на карличното дно, подобро постпородилно образование или едноставно знаењето дека не сте сами – вели Алексис Кристијана, мајка на три деца која доживеала инконтиненција по нејзиното трето породување.

Што се случува кога не се лекува?

Симптомите на постпородилна инконтиненција може многу да варираат, а според Кајл Греам, специјалист по акушерство и гинекологија, вообичаено е реакциите на инконтиненција да се разликуваат.

Постпородилната инконтиненција може да влијае врз животот на жената на многу подлабок начин.

Ментално здравје

Според истражувањата, 71 отсто од жените со постпородилна инконтиненција пријавиле анксиозност, стрес и чувство на несигурност, вели Фоснајт.

-Постпородилната инконтиненција предизвикала 27 отсто од мајките да се чувствуваат несигурни, заедно со стресот (23,6 %), анксиозноста (21 %) и депресијата (13 %).

Изабела Молет, мајка на три деца, вели дека постпородилната инконтиненција била неочекуван предизвик кој влијаел врз нејзиниот секојдневен живот и нејзината самодоверба.

-Едноставните активности како смеење, кивање или трчање по децата станаа моменти на анксиозност – додала таа.

Истражувањата покажуваат и дека жените со инконтиненција имаат поголеми шанси да развијат постпородилна депресија.

-Постпородилната инконтиненција е поврзана со перинатално расположение и анксиозни нарушувања и може да доведе до поголеми тешкотии во психосоцијалното приспособување по породувањето – потврдува Лејси Вудс Хочкамер, терапевт за здравје на карлицата.

Дневни активности

Две од три испитанички во студијата пријавиле дека недостигаат социјални активности поради инконтиненција. Ова може да им пречи на секојдневните активности бидејќи луѓето со овој проблем постојано мора да бараат тоалет. Тие често стануваат помалку активни бидејќи се плашат од неволни протекувања.

Спиење и сексуален живот

Постпородилната инконтиненција може да влијае и врз квалитетот на сонот, ако луѓето се обидуваат почесто да одат во тоалет или ако по грешка го влошат проблемот со правење премногу Кегелови вежби. Состојбата може да влијае и врз сексуалниот живот. Жените може да доживеат намалено задоволство за време на сексот или може целосно да го избегнуваат сексот, што влијае врз нивната самодоверба, идентитет и односот со партнерот.

Видови постпородилна инконтиненција

Постојат два типа постпородилна инконтиненција: стресна и ургентна инконтиненција.

Инконтиненција поради стрес (СУИ): овој тип инконтиненција вклучува истекување што се јавува поради зголемен притисок врз стомачните мускули, често предизвикано од смеење, кивање, кашлање или вежбање.

Инконтиненција поради нагон за мокрење (УУИ): овој тип инконтиненција доаѓа со ненадеен нагон за мокрење и се јавува кога мускулите на мочниот меур прерано се контрахираат.

Третман на постпородилна инконтиненција

Постпородилната инконтиненција најдобро се лекува со терапија на карличните мускули, велат експертите. Терапијата се фокусира на идентификување на физичките, емоционалните и социјалните фактори поврзани со дисфункција на мускулите на карличното дно. Ако имате слабост на карличните мускули, Кегеловите вежби можат да бидат корисни за зајакнување на овие мускули. Ако вашите мускули се премногу затегнати, важно е да работите на релаксирање на карличните мускули, вклучувајќи јога и дишење. Во секој случај, важно е да се консултирате со терапевт за да ја дознаете точно состојбата на вашите мускули и да го изберете соодветниот третман.

Зошто да се лекува инконтиненцијата?

Инконтиненцијата е сигнал на вашето тело дека карличните мускули не функционираат правилно. Третманот е важен бидејќи овие мускули играат клучна улога во стабилизирањето на вашето тело. Ако не ги лекувате, постои ризик од повреда на други делови од телото, како што е долниот дел на грбот. И покрај предизвиците, постпородилната инконтиненција може да се лекува, а раната интервенција може да ги врати контролата и довербата на мочниот меур.

-Многу жени страдаат во тишина, но барањето помош од терапевт на карлицата или здравствен работник може драматично да го подобри квалитетот на животот – заклучува Фоснајт.

Автор: Карина Шиждрак

Извор