Кога бебето ќе се роди предвреме, непосредниот контакт „кожа на кожа“ може да му го спаси животот.

Наместо новороденчињата со мала тежина да се ставаат во инкубатор, ново истражување посочува дека тие треба да бидат сместени близу до градите на нивната мајка и да се хранат исклучиво со мајчино млеко.

Овој пристап, наречен „кенгур-грижа“, се покажа како еден од најдобрите и најбезбедни начини за лекување на недоносени деца со мала родилна тежина, што резултира со помалку инфекции, повисоки стапки на доење и подобро зголемување на телесната тежина.

И покрај зголемениот број придобивки, практиката не е широко прифатена.

Во моментов, Светската здравствена организација препорачува континуирана „кенгур-грижа“ за сите предвремено родени бебиња, но само откако ќе бидат однесени и прогласени за клинички стабилни во единицата за интензивна нега на новороденчињата.

Рандомизирано контролирано испитување во пет болници сега сугерира дека препораката на СЗО рано ги разделува бебињата и нивните мајки. Наместо тоа, болниците треба да создадат одделение за нега на мајката и детето со кревети и столови, така што болничкиот персонал ќе може истовремено да се грижи и за мајката и за бебето.

Истражувањето било спроведено на 3.211 доенчиња со мала тежина во Гана, Индија, Малави, Нигерија и во Танзанија, на кои им била доделена непосредна „кенгур-грижа“ во специјално уредена „интензивна нега“ или биле одделени од мајките за конвенционална нега, со кратко дозволени моменти на допир по првите 24 часа.

Во првите три дена доенчињата што добиле непосреден контакт кожа на кожа поминувале околу 17 часа на ден во специјално направената интензивна нега за мајките. Во меѓувреме, оние доенчиња ставени во инкубатори добивале само 1,5 час наизменичен дневен контакт.

Во споредба со конвенционалната неонатална нега, оние новороденчиња што веднаш добиле допир од мајката имале 25 отсто помали шанси да умрат во првиот месец од животот.

Континуирано држените новороденчиња, исто така, имале помала веројатност да развијат хипотермија, веројатно затоа што имале поголема изложеност на заштитниот микробиом на нивната мајка, имале поголема веројатност да примаат рано мајчино млеко и со нив управувале помалку луѓе.

Избегнувањето на стресот од разделувањето на мајката и доенчето исто така може да придонесе за поголеми здравствени резултати.

Докажано е дека допирот со мајката го стабилизира пулсот на новороденчето, го смирува дишењето и го намалува плачењето.

– Ако мајката и бебето се заедно уште од самото раѓање и воопшто не се одделат, тоа ќе направи револуција во начинот на практикување неонатална интензивна нега кај бебиња родени предвреме или бебињата со ниска родилна тежина – тврди Раџив Бахл, раководител на одделот за истражување и развој на здравјето на мајките и новороденчињата при СЗО.

– Ова истражување илустрира дека „кенгур-грижата“ има потенцијал да спаси уште многу животи ако се започне веднаш по раѓањето, што е откритие релевантно за земјите од сите нивоа на приходи – додава тој.

„Кенгур-грижата“ е безбедна и ефективна алтернатива која е многу полесно да се спроведе

Денес, над 96 отсто од сите доенчиња со мала родилна тежина се родени во земјите во развој, а овие деца се особено ранливи на заразни болести, доцнења во развојот и смрт.

Конвенционалната неонатална нега е скапа и бара голема вештина и логистичка поддршка, што многу земји со пониски примања не можат да си го дозволат. Од друга страна, „кенгур-грижата“ е безбедна и ефективна алтернатива која е многу полесно да се спроведе.

Наодите ја поддржуваат неодамнешната метаанализа која открила дека „кенгур-грижата“ по клиничка стабилизација резултира со 40 отсто помала смртност кај новороденчињата.

Сепак, многу предвреме родени бебиња не одат во таа фаза. Студиите откриваат дека речиси 50 отсто од смртните случаи на новороденчињата кај голем број азиски и африкански нации се случуваат во рок од 24 часа по породувањето, а 80 отсто се случуваат во првата недела од животот, што значи дека се губат многу животи пред да почне да се практикува „кенгур-грижата“.

– Идејата за контакт кожа на кожа веднаш по породувањето кај многу мали, нестабилни бебиња наиде на доста силен отпор, но околу 75 отсто од смртните случаи се случуваат пред да се оцени дека доенчето е доволно стабилно – објаснува Нилс Бергман од Каролинска институтот во Шведска.

Доколку новороденчињата со мала тежина веднаш по раѓањето добијат „кенгур-грижа“, авторите на новото истражување проценуваат дека тоа може да спаси 150.000 новороденчиња со ниска родилна тежина секоја година.

СЗО во моментов е во процес на прегледување на своите упатства за „кенгур-грижа“.

Извор