Домашните миленици носат радост и љубов во нашите домови, но ново истражување покренува интересно прашање – какво е нивното вистинско влијание врз успехот на училиште на децата? Научниците од САД и од Велика Британија проучувале како миленичињата можат да влијаат врз различни аспекти на развојот на децата, вклучувајќи ги нивните когнитивни способности и однесување на училиште.

Студијата, објавена во „Нејкед сајнс“, опфатила повеќе од 14.000 деца родени помеѓу 1991 и 1992 година во југозападниот дел на Англија. Податоците се собирале до нивниот 18. роденден, следејќи ги нивните развојни и образовни достигнувања. Според резултатите, поседувањето домашно милениче позитивно влијаело врз невербалната комуникација кај децата до две години, како и врз јазичните способности на петгодишните деца.

Но, истражувањето покажало и предизвици. Децата со домашни миленици имале малку поголеми тешкотии во училишните предмети како што се математика, англиски и природни науки. Исто така, кај нив била забележана поголема хиперактивност на рана возраст, која можеби е поврзана со желбата на родителите да ги смират немирните деца преку домашно милениче.

Истражувачите предупредиле да не се донесуваат избрзани заклучоци за влијанието на домашните миленици врз децата. Развојот на децата е сложен процес под влијание на различни фактори, вклучително и социјалната и семејната средина. Исто така, секој домашен миленик има различна динамика и начинот на кој влијае врз детето.

Истражувачите ја нагласуваат потребата од понатамошни истражувања за да се разберат подлабоките ефекти на домашните миленици врз развојот на децата и училишните перформанси. Можеби идните студии ќе ги разјаснат овие нејаснотии и ќе дадат попрецизни препораки за родителите.

Извор