Кога сфатила дека нејзината четиригодишна ќерка цртала по целиот ѕид од спалната соба, мајката се изненадила. Но, нејзината реакција подоцна стана вирална и предизвика дебата за родителството. Амелија Едвардс, 31, од Велика Британија ја споделила приказната за својата ќерка, која сега има седум години, чии цртежи сè уште се на ѕидот од нејзината спална соба.

Моментот на откритие

Амелија сè уште се сеќава на моментот.

-Бев на скалите кога таа истрча од спалната соба викајќи: „Мамо, мамо, дојди и види што сум направила!“ Ме зграби за рака со толку голема возбуда и ме одвлече во собата. Мајка ми беше исто така таму, па нè следеше. Кога првпат ги видов цртежите, останав без зборови – раскажала мајката.

Потоа нејзината ќерка цртала по целиот ѕид покрај нејзиниот кревет. Нацртала повеќе од десет дизајни, облаци, насмеано сонце, животни, луѓе, сладолед и еднорог.

Неочекувана реакција

Додека повеќето родители прво би помислиле на бојадисување на ѕидот, мајката се насмеала и рекла: „Ова е навистина одлично“.

-Кога конечно прозборев, ѝ кажав дека цртежите се прекрасни и ѝ дозволив да ужива во својот момент. Ми го покажа секој цртеж и ми објасни што значи, дека еднорогот е нејзино мече, дека ги сака пајаците, па нацрта еден и така натаму. Можеше да се види дека размислувала за тоа и дека е навистина креативна – рекла мајката.

Таа ја искористила можноста да ѝ објасни на својата ќерка дека треба да се црта на хартија, а не на ѕидовите, но одлучила да ги задржи цртежите.

-Наместо да ја прекоруваме, решивме да ја адаптираме просторијата според нејзиниот цртеж, а тоа отвори навистина убав разговор за креативноста и како децата можат да пробуваат работи без страв – додала мајката.

Врамено ремек-дело

Амелија објавила видео на „Тик-ток“ . Прво, може да се види нејзината ќерка како гордо седи на креветот пред цртежот, а потоа може да се види дека зачувале сè: ја украсиле собата со розов и крем-тапет, а дел од ѕидот со цртежите останал недопрен и сега е „врамен“ во розова боја. Видеото брзо станало вирално и собрало речиси два милиони прегледи, а коментарите започнале дискусија за стиловите на родителство.

Реакции

Додека некои пишувале дека детето треба да научи дека цртањето по ѕидовите е погрешно, други ги споделиле своите искуства. „Имав дозвола да цртам по ѕидовите, па секојпат кога некој ќе дојдеше, го додавав неговиот цртеж, и тој ѕид чува толку многу спомени“, напишал еден корисник.

Лекција за родителство

Амелија вели дека нејзината ќерка оттогаш не цртала по ѕидовите, но додава дека сè уште е „паметна и многу креативна“.

-Секако дека некои луѓе не би се согласиле со мојата одлука и тоа е во ред. Секој ги воспитува своите деца поинаку. Мене ми беше поважно да се одржи блискоста отколку да се одржи лекција – објаснила таа.

Извор