Нашите животи дефинитивно се променети во споредба со тоа какви беа пред неколку децении. Највпечатлив е фактот дека користиме многу повеќе технологија – неспоредливо повеќе технологија. Иако ова има свои добри и корисни страни, понекогаш негативните и лошите нè изненадуваат. Особено кога ги гледаме последиците врз нашите деца…

Многумина непријатно се изненадија откако ги видоа резултатите од студија спроведена во Обединетото Кралство. Резултатите покажале дека речиси една третина од децата од предучилишна возраст не знаат како правилно да користат книги. Некои деца дури се обиделе да ги прелистуваат или да ги допираат страниците на книгите како што допираат паметен телефон.

Студијата ја спровела британската добротворна организација „Киндред Скуерд“, а тие анкетирале наставници и родители. Во оваа студија ја одделиле буквалната физичка употреба на книгите од писменоста и се фокусирале на способноста на детето интуитивно да врти страници. Додека 44 проценти од родителите рекле дека веруваат оти вртењето страници е нешто што детето треба да може да го прави, реалноста била малку побрутална. Околу 1.000 анкетирани наставници рекле дека околу една третина од децата, 28 проценти, не можеле да вртат страници и да користат книги. Во истата анкета наставниците рекле дека околу една четвртина од децата не биле научени да користат тоалет и не можеле самостојно да јадат и да пијат.

Овие резултати се мрачен потсетник за тоа како паметните телефони ги презедоа нашите животи и како работите само ќе се влошуваат, и како времето поминато пред екраните ќе продолжи да влијае лошо врз развојот на децата.

На пример, силна врска помеѓу времето поминато пред екраните и дијагнозите на АДХД била документирана во студија што ги следела тинејџерите четири години. За деца на возраст од четири години и помали, студија од 2023 година открила дека оние што поминувале неколку часа на ден гледајќи во екрани имале поголема веројатност да ги пропуштат клучните развојни пресвртници, вклучувајќи ги јазикот, социјалните вештини и фините моторни вештини.

Студија спроведена на деца на возраст од 12 години и помлади покажала дека колку помлади децата добиваат паметен телефон, толку е поголем ризикот од појава на дебелина, недостиг на сон и депресија. Сето ова во време кога многумина се борат да воведат технологија и вештачка интелигенција во училиштата… Не го знаеме вистинскиот рецепт бидејќи сè уште не сме го откриле, но сигурно знаеме дека раните години не се вистинско време за (прекумерно) користење екрани.

Сите понекогаш посегнуваме по екрани, што не нè прави лоши родители, но преминувањето на границата во таа изложеност и ставањето на децата во ситуации каде што се доведени до состојба да не знаат да прелистуваат книга или да одат во тоалет – тоа не е и не може да биде добро.

Извор