Секојдневно гледаме слики или видеа на социјалните мрежи од „совршени“ семејства, здрави оброци, деца кои секогаш се насмеани и родители кои изгледаат како да имаат бесконечно трпение. И додека ги гледаме тие моменти, во нас често се раѓаат тивки, но тешки прашања: „Дали правам доволно? Дали сум добар родител?“

На вашето дете не му треба совршена верзија од вас. Му требате вие, такви какви што сте, со сите ваши грешки, со целиот ваш замор и искрената љубов.

Моќта на „доволно добриот“ родител

Во светот на педагогијата постои еден ослободувачки концепт наречен „доволно добар родител“. Тоа е оној родител што понекогаш го губи трпението, заборава да купи нешто за во училиште или послужува вечера која не е баш „по рецепт“.

Но, тоа е и истиот родител кој знае да клекне, да го погледне детето в очи и да каже: „Извини, бев изморен, не требаше да викам“. Со овој чин вие му го давате на вашето дете најголемиот подарок во животот, дозвола и тоа да биде несовршено. Вие го учите дека грешките се поправаат и дека љубовта не зависи од тоа дали сме биле „умни“ или „совршени“.

Што, всушност, гледаат децата?

Вашето дете не ги гледа вашите неизмиени садови, ниту пак ја забележува вашата нервоза поради работата. Тоа го чувствува само вашиот мирис и близината додека му читате приказна. Го гледа начинот на кој му ја поправате косата. За него, вие не сте „мајка со кариера“ или „татко кој е преморен“, вие сте целиот негов свет. Вие сте неговото безбедно пристаниште.

Препорака од педагог: „Тегла на скапоцени моменти“

За да си докажете себеси колку сте прекрасни во својата улога, ви препорачувам една едноставна, но моќна вежба.

• Потребни материјали: Една обична стаклена тегла, мали ливчиња хартија (може и во боја) и едно пенкало.
• Активност: Секоја вечер, пред да легнете, запишете една работа што ве насмеала кај вашето дете или еден момент во кој сте почувствувале поврзаност. Примери: „Денес ме гушна без причина“, „Се смеевме додека го баравме изгубениот чорап“, „Денес успеав да останам смирен иако истури сок“.
• Зошто ова функционира? Нашиот мозок е програмиран да ги памети стресните моменти, а брзо да ги заборава малите победи. Оваа тегла е ваш физички доказ дека успевате. Во деновите кога сте исцрпени, само извлечете едно ливче и потсетете се дека во очите на вашето дете веќе сте суперхерој.

Драги родители, баби и дедовци, здивнете. Вашето дете не сака совршенство, ве сака вас. И верувајте, вие сте сѐ што му е потребно.