Речиси половина милијарда тинејџери низ целиот свет ќе бидат со прекумерна тежина или дебели до 2030 година, проценуваат експертите, предупредувајќи дека здравјето на адолесцентите е на „пресвртна точка“.

Во голем нов преглед на здравјето и благосостојбата на адолесцентите, експертите велат дека главните двигатели на лошото здравје кај тинејџерите повеќе не се цигарите и алкохолот, туку зголемувањето на телесната тежина и проблемите со менталното здравје. Тие предупредуваат дека менталното здравје кај тинејџерите претрпело „значителен пад“ во последните три децении, влошено од кризата предизвикана од пандемијата на ковид-19.

Тие проценуваат дека 464 милиони тинејџери низ целиот свет ќе бидат со прекумерна тежина или дебели до 2030 година, 143 милиони повеќе отколку во 2015 година. Но, Комисијата за здравје и благосостојба на адолесцентите „Лансет“ забележала дека во однос на здравствените ризици, употребата на супстанции (особено тутун и алкохол) се намалила во секој регион. Експертите од комисијата нагласиле дека е потребна акција за справување со заканите за здравјето и благосостојбата на адолесцентите. Тие предупредуваат дека напредокот во здравјето на адолесцентите „значително заостанува“ зад подобрувањата во здравјето и развојот на малите деца.

-Адолесценцијата повеќе не може да се игнорира… време е да се дејствува – рекле тие.

„Дигиталниот свет“ и влијанието врз здравјето на адолесцентите

Авторите на извештајот, исто така, истакнале дека преминот кон „подигитален свет“ може да има длабоки импликации за идното здравје и благосостојба на младите луѓе. Но, тие исто така предупредиле на „премногу рестриктивен“ пристап, велејќи дека мора да има рамнотежа, истакнувајќи дека онлајн светот им нуди на тинејџерите нови можности за социјална интеракција, образование, вработување и унапредување на здравјето. Експертите, исто така, истакнуваат дека оваа генерација тинејџери е првата што расте во посурова клима.

Копретседателката на Комисијата, професорката Сара Берд од Универзитетот „Џорџ Вашингтон“ во САД, вели дека здравјето и благосостојбата на адолесцентите низ целиот свет се на пресвртница, со мешан напредок забележан во текот на изминатите три децении.

-Додека потрошувачката на тутун и алкохол се намали, а учеството во средното и високото образование се зголеми, прекумерната тежина и дебелината се зголемија осумкратно во некои земји во Африка и Азија во текот на изминатите три децении, а товарот на лошото ментално здравје на адолесцентите расте глобално – вели таа.

Покрај тоа, предизвиците со кои се соочуваат адолесцентите низ целиот свет се изложени на ризик да бидат влошени од нови глобални проблеми, вклучувајќи ги климатските промени, глобалните конфликти и брзата транзиција кон подигитален свет, предупредува таа. Инвестирањето во здравјето и благосостојбата на младите луѓе е клучно за заштита на нашата колективна иднина, вели Берд.

Авторите на извештајот велат дека инвестирањето во здравјето на адолесцентите ќе станува сè поважно во текот на 21 век.

-Како што населението старее и стапките на фертилитет паѓаат дури и во најсиромашните земји, обезбедувањето на здравјето и благосостојбата на адолесцентите ќе биде клучно за здравјето и просперитетот на сите земји – велат експертите.

Извор