Жените во триесеттите години кои свесно ја одложуваат бременоста треба да размислат за својата плодност, советуваат лекарите. Гинекологот и акушер д-р Амбрин особено ја нагласува важноста на едноставен тест на крвта што може да помогне во процената на идните шанси за зачнување. Тоа е AMХ тестот, кој ги открива резервите на јајце-клетки.

Што е AMХ тестот?

AMХ (анти-Милеровиот хормон) тест е тест на крвта што го мери нивото на овој хормон во телото на жената. Тој помага да се процени таканаречената резерва во јајчниците, или бројот и квалитетот на јајце-клетките што сè уште се преостанати. Ова дава појасна слика за плодноста и колку време жената потенцијално има за успешно зачнување.

Зошто и кога да се направи тестот?

Д-р Амбрин им советува на жените кои имаат 30 години или повеќе и моментално не планираат бременост да го разгледаат овој тест. Според неа, тестот е особено корисен во следниве случаи:

-Ако имате над 30 години и планирате да забремените подоцна.
-Ако постои семејна историја на рана менопауза или проблеми со плодноста.
-Ако имате нередовни менструации.
-Ако сте имале операција на јајчниците.
-Ако сте биле подложени на хемотерапија или зрачење.
-Ако имате ендометриоза.
-Ако планирате да ги замрзнете вашите јајце-клетки или се подготвувате за ин витро оплодување.

Како изгледа тестот?

Ова е едноставен тест на крвта. Не е потребна посебна подготовка и може да го направите во кој било ден од вашиот менструален циклус.

Пред тестот, се препорачува да му кажете на вашиот лекар за вашата возраст и да направите ултразвук за да се процени бројот на антрални фоликули. Д-р Амбрин нагласува дека одлуките не треба да се базираат само на еден број – треба да се земе предвид пошироката слика.

Како да се толкуваат резултатите?

Ниски нивоа на AMХ: укажуваат на намалена резерва на јајце-клетки. Ова значи дека шансите за природна бременост се помали, а лекарите во овој случај советуваат да се разговара за опции како што се замрзнување на јајце-клетки или асистирана репродукција (ин витро).

Високи нивоа на AMХ: може да укажува на синдром на полицистични јајчници, каде што бројот на јајце-клетки може да биде зголемен, но нивниот квалитет не е загарантиран.

-Количината не значи квалитет, а постои и поголем ризик – објаснува гинекологот.

Тестот за AMХ не е метод на контрацепција, ниту гаранција дека дефинитивно ќе забремените во иднина. Исто така, иако здравиот начин на живот, кој вклучува квалитетен сон, здрава исхрана и откажување од пушење, има позитивно влијание врз целокупното репродуктивно здравје, тој не може да го зголеми бројот на преостанати јајце-клетки.

Извор