Бијонсе: „На децата не им е грижа со што се занимавате, тие само ја сакаат својата мајка“
Бијонсе отсекогаш го чувала својот приватен живот, но во неодамна објавениот документарен филм „Ренесанса“ таа дала редок увид во нејзиниот стил на родителство.
Сопругот Џеј Зи и нивните три деца Блу Ајви (11) и близнаците Руми и Сер (6) ѝ се придружиле на светската турнеја и се појавуваат во текот на целиот филм. Блу Ајви дури ѝ се придружила на нејзината мајка на сцената и на сите им одржала лекција за издржливост.
Еве што опфаќаат методите за родителство што ги следи познатата пејачка.
Ги слуша своите деца, но се држи до поставените цврсти граници
Во еден дел од филмот Бијонсе разговара за списокот со песни за концерт, додека Блу Ајви е во друг дел од собата. Кога 11-годишното девојче дознава дека песната „Дива“ може да биде отфрлена, таа се вмешува и вели: „Не можеш да не ја пееш таа песна“.
Бијонсе возвраќа: „Го ценам твоето мислење, но треба да се смириш. Не можеш да ги прекинуваш луѓето“.
Ова е најдобар доказ дека Бијонсе го почитува мислењето на својата ќерка, но ја поттикнува да мисли и на другите. На крајот, конечната одлука е секогаш нејзина, а таа очекува ќерката да го почитува тоа.
Таа е заштитнички настроена кон децата
Кога Блу Ајви ја прашала мајка си дали може да оди на турнеја со неа, Бијонсе одговорила „не“. Чувствувала дека нејзината ќерка не поминала низ одредени препреки и борби кои би ја подготвиле за таков чекор. На крајот попушта, а по првиот настап, на социјалните мрежи се прошириле негативни коментари за настапот.
„Бев разочарана што Блу имаше пристап до такви вести, но овие коментари ја мотивираа да вежба уште повеќе и да стане посилна. Воодушевена сум што е толку бестрашна. Гледам дека има доверба и верува во себе“, изјавила Бијонсе.
Бијонсе ѝ припишува заслуга на сопствената мајка што ја држи приземјена, а истото сака да им го всади и на своите деца
Во трогателен момент во филмот, Бијонсе разговара со нејзината мајка Тина Ноулс-Лосон зад сцената и ѝ се заблагодарува што е тука за неа.
„Сето ова е поради тебе“, ѝ вели таа на мајка си и ја прегрнува.
Бијонсе ѝ припишува заслуга на сопствената мајка за нејзиниот успех, но и за фактот дека останала приземјена и покрај големата слава. Таа го сака истото и за своите деца, па затоа одвојува време на турнејата кое ќе го помине со семејството и ќе им даде приоритет на потребите на децата.
„На децата не им е грижа со што се занимавате. Тие само ја сакаат својата мајка“, заклучила таа.
