Аутизмот и АДХД се почести кај момчињата – научниците имаат објаснување
Момчињата имаат три пати поголема веројатност да добијат дијагноза за аутизам и нарушување на вниманието и хиперактивност (АДХД) отколку девојчињата, а научниците од Универзитетот во Рочестер веруваат дека ја пронашле причината. Нивната нова студија сугерира дека момчињата се почувствителни на одредени штетни хемикалии од животната средина кои влијаат врз развојот на мозокот.
Опасни хемикалии и нивните ефекти врз мозокот
Истражувањето се фокусира конкретно на „PFHxA“, хемикалија што се користи во пакувањето храна и ткаенините. Спаѓа во групата таканаречени „перзистентни хемикалии“, кои практично не се разградуваат во животната средина и можат да траат илјадници години. Овие хемикалии се наоѓаат во пластични шишиња, облека, па дури и во вода за пиење. Тие се поврзани со сериозни здравствени проблеми како што се рак, неплодност и вродени дефекти.
Научниците ја тестирале „PFHxA“ на глувци. За време на бременоста и лактацијата, женките биле хранети со храна што ја содржела хемикалијата, изложувајќи ги своите потомци на неа и пред и по раѓањето.
Промени само кај машките
Резултатите покажале дека само машките младенчиња покажале промени во однесувањето. Тие биле помалку активни, покажале повеќе знаци на анксиозност и имале проблеми со меморијата. Женките не покажале исти симптоми, што укажува на можна разлика помеѓу половите во чувствителноста на мозокот на овој вид хемикалија.
Особено загрижувачки е тоа што кај машките глувци се забележани промени во однесувањето неколку години по прекинувањето на изложеноста, што укажува дека „PFHxA“ може да има долгорочно влијание врз развојот на мозокот.
Научниците повикуваат на претпазливост
Професорката Елизабет Планк, раководител на студијата и експерт за еколошка медицина, ги опишува резултатите како „загрижувачки“. Тимот истакнал дека наодите треба да се гледаат во контекст на голем број невроразвојни нарушувања кои се почести кај момчињата.
-Разбирањето како „PFHxA“ влијае врз развојот на мозокот е клучно за усвојување соодветни закони и прописи – вели Планк.
Научниците планираат да продолжат со истражувањето, со посебен фокус на деловите од мозокот одговорни за движење, меморија и емоции, клучни области најчесто поврзани со аутизам и АДХД.
