Кога стресот станува преголем, многумина од нас бараат утеха во одвлекувачи на вниманието, а „бесконечното скролање“ на нашите телефони стана еден од најчестите начини за справување со притисокот. Ова е особено точно за оние што немаат здрави механизми за справување, вели д-р Адити Неруркар. Со оглед на тоа што мајките, и покрај тоа што еднакво придонесуваат со работата и финансиите, честопати носат поголем товар на административни и емоционални одговорности во домаќинството, не е изненадување што многу од нив се потпираат на своите телефони за да го преживеат денот. Наместо да ве игнорира, вашата мајка веројатно само се обидува да се справи со сопствените стравови.

Страв од безначајност

Многу жени толку се идентификуваат со улогата на мајка, што тоа целосно ги потиснува нивните сопствени интереси и потреби. Тие почнуваат да ја мерат сопствената вредност според тоа колку им се потребни на своите деца, а родителските одговорности стануваат апсолутен приоритет. Ако вашата мајка го поминува слободното време на телефон, таа можеби избегнува да се соочи со стравот дека повеќе не е потребна.

Бегство од сопствените мисли

Како што објаснува психологот Мишел Лено, многу луѓе не сакаат да бидат сами бидејќи тишината ги принудува да се соочат со своите потиснати емоции и непријатност. Едноставни задачи како препознавање на сопствените чувства може да изгледаат невозможни за мајките кои се постојано во движење. Мајка која го користи телефонот како одвлекување на вниманието всушност сака да избега од сопствените мисли. Ако забележите дека таа постојано скрола кога е сама или останува до доцна будна гледајќи телевизија, веројатно избегнува да се соочи со своите внатрешни стравови.

Неможност за забавување

За мајките што „жонглираат“ со безброј одговорности и очекувањето дека секогаш ќе ги стават потребите на своите деца пред своите, забавувањето може да изгледа како невозможна задача. Со текот на времето ова хаотично темпо станува длабоко вкоренета навика. Иако може да изгледа непријатно, забавувањето е од суштинско значење за благосостојбата на мајката и подобро родителство.

Избегнување конфликти

Според психотерапевтот Џенифер Герлах, избегнувањето тешки разговори може да ја намали тензијата на краток рок, но на долг рок, тоа само ги зголемува чувствата на огорченост, стрес и раздразливост. Решавањето на конфликтите и здравата комуникација се основа на здрави врски. Кога мајките избегнуваат тешки теми заради моментална удобност, тие ја загрозуваат сопствената благосостојба и ја нарушуваат семејната динамика.

Справување со брачни проблеми

Повеќе од една третина од паровите доживуваат брачни проблеми во првата година по раѓањето на детето. За мајките што често доживуваат драматична промена во нивниот личен идентитет, дополнителниот стрес во нивната врска може да биде исклучително тежок. Под притисок да држат сè под контрола, справувањето со отуѓен брак може да биде последната капка која ја прелива чашата. Скролањето потоа станува одбранбен механизам што ги штити од болната реалност, бидејќи обидот да се поврзат со нивниот партнер носи ризик од отфрлање или конфликт.

Тага и траума

Иако е тешко директно да се поврзе нерешената мајчинска траума со резултатите кај децата, едно истражување покажало дека бебињата на такви мајки имаат поголема веројатност да развијат несигурни стилови на приврзаност. Ова ја нагласува важноста на справувањето со сопствените трауми. Ако мајката не се соочи со сопствената тага или траума, таа ќе продолжи да се враќа. Скролањето на телефонот може да биде начин да се избегне срамот или вината, поврзани со влијанието на сопствените проблеми врз нејзините деца.

Признавање на сопственото прегорување (исцрпеност)

Студија од 2025 година потврдува дека менталното здравје на мајките од сите генерации се влошува. Без разлика дали станува збор за прегорување од недостиг на поддршка или товар од емоционален труд, мајките често се соочуваат со невозможни очекувања. Ако забележите дека вашата мајка постојано го користи телефонот и тешко бара помош, таа веројатно избегнува да се соочи со сопственото прегорување. Можеби се плаши да признае дека не може сè сама, плашејќи се дека ако забави, целото домаќинство ќе се распадне.

Поставување здрави граници

Психологот Пег Стрип тврди дека границите се клучни за одржување здрава семејна динамика. Без разлика дали станува збор за очекувања за комуникација или заштита на слободното време, границите ги штитат сите членови на семејството. Меѓутоа, ако мајката избегнува тешки разговори и го користи телефонот како одвлекување на вниманието, таа веројатно не ги поставува потребните граници.

Егзистенцијална криза и празнина

Мајките кои се потпираат на постојана стимулација преку „бесконечно скролање“ можеби избегнуваат соочување со тешки егзистенцијални прашања како што се: „Дали ова е навистина сè што постои во животот?“, „Која е мојата цел?“ или „Што ако не ми се допаѓа животот што сум го избрала?“ Лесно е да се игнорира копнежот кога сте постојано зафатени, но во моменти на тишина, овие чувства излегуваат на површина.

Страв од барање помош

Иако мрежите за социјална поддршка се клучни за благосостојбата на мајките, една студија објаснува дека на многу жени им е речиси невозможна опцијата да побараат помош. Тие се навикнати да го носат товарот на сите околу нив, па затоа помислата да признаат дека не можат да направат нешто сами е застрашувачка. Потпирањето на другите може да се сфати како слабост, поради што тие избираат да се дистанцираат и да избегаат во дигиталниот свет.

Губење на релевантноста

Стравот од тоа да станат ирелевантни е особено изразен кај мајките на тинејџери и возрасни деца. Како што децата природно се оддалечуваат, постојаното „скролање“ може да изгледа како начин да останат релевантни. Тие сакаат да ги разберат новите трендови, жаргонот и технологијата што ги користат нивните деца. Во овој случај, телефонот не е толку механизам за бегство, колку алатка за учење што им дава чувство на поврзаност со светот на нивните деца. Меѓутоа, ако тоа стане навика, може да доведе до избегнување на вистинската комуникација.

Извор