Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Мајка сум на 15-месечно синче кое последниве три недели има проблем со спиењето. Не заспива порано од 3 часот, а насабајле спие до 12-13 часот. Првото преспивање му е час-два, а потоа е буден околу 3-4 часот и повторно сака да преспие. Пробав да го будам порано, но не сака да стане, му се спие, не ги ни отвора очињата. Инаку, често плаче во сон, па се буди вознемирен. Што да направам?

ОДГОВОР: Спиењето е примарна и биолошка потреба која е особено важна за развојот на децата во рана детска возраст. Бидејќи процесот на спиење е регулиран од биолошкиот часовник на организмот и нервниот систем, потребно е да се воведе рутина и конзистентен начин на будење и легнување. Вашето дете воспоставило веќе некакво темпо на спиење со тоа што легнува доцна во три часот по полноќ, а станува во 13 часот напладне.

За да го поправите овој временски интервал и да воспоставите здрав биолошки часовник, потребно е секојдневно да го поместувате нанапред, за еден час, времето на будење. Значи ако станува во 13 ч., следниот ден го будите во 12 ч., потоа во 11 ч. Следниот во 10 ч. и сѐ така до 7 ч. наутро. Во тој период бидете истрајни и упорни без откажување и повторно враќање на стариот начин на функционирање. Вечерните часови да бидат часови на спиење за целото семејство, со изгасено светло во домот и без изложеност на екран и шеќери пред заспивањето.

Одговара: Христина Стефановска, психолог за деца и адолесценти, Здружение „Психит“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.