Калциумот ги гради коските и забите, овозможува правилно функционирање на нервите и на мускулите. На возрасните им требаат околу 1.000 милиграми дневно, а најлесен начин да го добијат е преку млечните производи. Меѓутоа, доколку сте веган, нетолерантни на лактоза или едноставно не сакате млечни производи, постојат и други намирници кои содржат висок процент на калциум. Овие намирници се одлични за децата што растат и се развиваат:

Зелка

Содржина на калциум: 268 милиграми во 190 грама зготвена зелка.

Оваа храна содржи четвртина од дневниот препорачан внес, а богата е и со витамин А за дури три дневни дози, што е важно за видот. Одличен додаток на зелката се маслиновото масло и лукот.

Брокула

Содржина на калциум: 86 милиграми во 200 грама.

Покрај тоа што е богата со калциум, брокулата содржи речиси двојно повеќе витамин Ц од портокалите. Истражувањата покажале дека исхраната богата со брокула, зелка, карфиол го намалува ризикот од одредени видови рак.

Кељ

Содржина на калциум: 101 милиграм во 67 грама.

Има само 30 калории по порција, содржи доволна дневна доза на витамин Ц и двојно поголема дневна вредност од витамин А. Содржи и витамин К.

Смокви

Содржина на калциум: 121 милиграм во 75 грама суви смокви.

Ова вкусно овошје е богато со влакна и калиум. Смоквите содржат и магнезиум, минерал кој телото го користи за околу 300 биомеханички реакции, како што се одржување на мускулната функција, одржување на работата на срцето и зајакнување на коските.

Портокал

Содржина на калциум: околу 74 милиграми во голем портокал и околу 27 милиграми во сок од портокал.

Портокалите го подобруваат имунитетот бидејќи се богати со витамин Ц, но содржат и низок процент на калории и многу антиоксиданси.

Сардини во конзерва

Содржина на калциум: околу 350 милиграми на 100 грама.

Оваа солена конзервирана риба може да биде добар додаток на салати и тестенини. Покрај тоа што содржат голема количина калциум, тие се добар извор на витамин Б12, неопходен за нервниот систем и витамин Д, важен за здравјето на коските.

Конзервиран лосос

Содржина на калциум: околу 232 милиграми во половина лименка.

Ако не можете да најдете лосос за кој знаете дека е свеж, конзервираниот лосос е идеалното решение. Покрај калциум, содржи и околу 38 грама протеини.

Бел грав

Содржина на калциум: околу 63 милиграми во 90 грама варен грав.

Оваа хранлива намирница е богата со влакна, протеини и железо, како и со калиум. Содржи и здрав скроб и јаглехидрати, кои помагаат во забрзување на метаболизмот.

Тофу

Содржина на калциум: околу 434 милиграми во 113 грама тофу.

Тофу е вегетаријански извор на протеини, но и многу богат со калциум. Тофуто е намирница која може да се комбинира на многу начини, бидејќи го прима вкусот на храната со која се подготвува.

Бадеми

Содржина на калциум: 20 бадеми имаат околу 75 милиграми калциум.

Бадемите се многу здрави, содржат околу 12 проценти од дневните потреби за протеини, богати се со витамин Е и калиум. Тие исто така содржат добри масти кои го намалуваат лошиот холестерол.

Извор