Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Мајка сум на 16-месечно синче и последниве три недели има голем проблем со спиењето – не заспива порано од 3:00 часот и насабајле спие до 12-13 часот. Пробав секакви трикови, му сменив ред, го будев порано наутро, но ништо не помогна. Никако не сака да стане, не ги ни отвора очињата. Преспива два пати преку ден, но не долго. Дајте ми совет како да постапам.

ОДГОВОР: Спиењето е сложен процес кој еволуира и се менува со текот на растењето и развивањето на детето, па така и во оваа возраст во која е вашето синче вообичаено е шемите на спиење да се менуваат. На таа возраст потребни е околу 11-14 часа сон во период од 24 часа, а обично се состои од 1-2 дремки во текот на денот и солидно спиење во текот на ноќта.
Но, за да му помогнете на вашето синче да развие здрави навики за спиење и да создаде структуриран ден, треба полека да се фокусирате на конзистентноста и рутината и полека да ги менувате неговите дневни навики.
Малку е невообичаено толку мало дете да спие толку долго до попладневните часови. Започнете со тоа што ќе го будите 15-30 мин. порано секој ден додека не се разбуди околу 8-9 часот наутро. На тој начин полека ќе се префрли остатокот од неговиот распоред порано. Започнете го денот секое утро со иста рутина, појадок, прошетка надвор и утринско време за играње. Доколку е активно детето до пред ручек, по ручек би било најдобро да ја има дремката. Обидете се да ја ограничите втората дремка или да преминете на една долга дремка во раните попладневни часови.

Потрудете се пред спиење да имате рутина, т.е. да сигнализирате дека е време за спиење, како капење, читање приказна или галење со тивка музика. Обидете се времето за спиење да биде во исто време секоја вечер, идеално помеѓу 19 и 21 часот.
Вашето дете сега расте, ќе почне сѐ повеќе да ја истражува околината, а вие сте тука да го стимулирате неговиот развој преку игра и други дневни активности. Постепено воведувајте ги овие промени за да може неговото тело да се приспособи, а доколку е потребно, консултирајте се и со вашиот педијатар.

Доколку ви е потребна дополнителна помош за тоа како да постапувате, како и за развојот на вашето дете, можете да закажете родителско советување и психоедукација на sovetuvanje@gmail.com

Одговара: Билјана Манасова-Јовановиќ, дефектолог и психотерапевт; Психотерапија и советување 
е-пошта: sovetuvanje@gmail.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца. На прашањата одговараат психолози и психотерапевти соработници на Деца.мк.