Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Син ми има 3 години и речиси една година ги има тргнато пелените, но сега почна многу да трпи до последен момент, дури и да се подмочува. Зошто го прави ова и како да го научам да престане да трпи до последен момент? И второ прашање – многу е инаетлив и често користи агресија кога ќе се налути, дури и вика, на што се должи ова и како да постапувам понатаму?

ОДГОВОР: Недостигаат неколку важни критериуми во вашето излагање. На пример, важно е да се спомене кога и во кои конкретни ситуации се јавува однесувањето, колку време трае или колку често се случува. Дали можеби одлагањето на потребата за уринирање трае откако забележавте и агресивно однесување? Таквите податоци би создале подобра слика за она што се случува со детето.

Ова е возраст кога детето почнува да ја бара својата независност и лесно се фрустрира при неодобрување, поставување граници и правила, па однесувањето може да премине во тантрум кој е развоен за оваа возраст. Споделивте дека забележувате агресивно однесување, но не го опишувате детално со што е тоа придружено. Впрочем, дали е агресивно однесување или е само начин на изразување на чувството на лутина. Лутината во оваа возраст е честа поради тоа што детето се бунтува и не ги сака границите кои му ги поставувате. Но лутината се воспитува.

Многу е важно како вие му покажувате какви сте кога сте лути. Детето сега учи по модел и вие ќе му бидете пример за тоа што треба, а што не треба да правиме кога сме лути. Можете да го сработите и психолошкиот прирачник за регулирање на лутината „Кога Мешко се лути“ со цел заемно да осознаете вештини и техники за нејзино канализирање. Доколку однесувањето и понатаму ве загрижува, обратете се директно до психолог, психотерапевт.

Одговара: Христина Стефановска, психолог за деца и адолесценти, Здружение „Хармоничен свет“, е-пошта: hristina_psihologija@yahoo.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.