Мајките што ги дојат своите бебиња посветуваат многу време на анализа на доењето. Тие пресметуваат колку количински и колку често јаде бебето. Секоја мајка забележува кога бебето јаде помалку или поретко од вообичаеното.

Кога се случуваат промени во доењето, важно е да се разбере што се случува и како да се подобри ситуацијата, односно како бебето да се врати на старо.

Како да го препознаете штрајкот за доење?

Штрајкот се дефинира како период во кој бебето кое инаку си цицало како што треба, одеднаш одбива да го прави тоа. Таквото однесување обично се случува откако бебето ќе наполни три месеци и ќе стане посвесно за светот околу него.

Бебињата што штрајкуваат обично одбиваат да цицаат, но истовремено изгледаат незадоволни и вознемирени затоа што не цицаат. Секако, фактот дека бебето понекогаш се оддалечува од градите или се повлекува не значи веднаш дека штрајкува. Можеби нешто го мачи.

Понекогаш родителите погрешно го разбираат штрајкот како знак дека бебето е подготвено да се одвикне од доење. Ова е мала веројатност бидејќи бебињата ретко се одвикнуваат од доење пред двегодишна возраст, а кога тоа ќе се случи, се прави со намалување на времетраењето и фреквенцијата на доењето, а не се прекинува наеднаш.

Зошто доаѓа до тоа?

Бебињата штрајкуваат од различни причини кои можат да бидат физички и емоционални. Некои од нив се:

– Блокада или болка во увото што го прави доењето непријатно;
– Болка во грлото или болка во устата што го прави доењето непријатно;
– Каква било болест што влијае врз устата на бебето и го прави доењето непријатно;
– Заби или болни непца;
– Фрустрација предизвикана од слаб проток на млеко или многу млеко;
– Фрустрација предизвикана од промена на вкусот на млекото поради хормонални промени или промени во исхраната;
– Шок по ситуација во која бебето се исплашило, да речеме, од плачот на неговата мајка откако тоа ја каснало;
– Бебето го чувствува стресот на мајката, лутината или која било друга состојба поради која не е сконцентрирано на доењето;
– Промена на производите за лична хигиена, поради што мајката мириса различно;
– Нарушувања предизвикани од премногу стимулирачка средина.

Иако голем дел од овие причини може лесно да се избегнат, важно е да бидете свесни што е тоа што се случува со вашето бебе што може да влијае врз доењето.

Што да направам ако бебето штрајкува?

Иако штрајкот може да биде стресен и за вас и за вашето бебе, постојат многу тактики што можете да ги користите за да му помогнете на вашето бебе успешно да се врати на доењето. Постојат два главни предизвици за кои треба да се грижите: одржување на снабдувањето со млеко и обезбедување храна за вашето бебе.

Имено, кога вашето бебе помалку цица, мора да го зачувате производството на млеко. Со молзењето му сигнализирате на телото дека и понатаму ви треба млекото, така што телото ќе продолжи да го произведува.

Што се однесува до бебето, обидете се да го храните со шишиња, бидејќи од суштинско значење е тоа да остане хидрирано и добро хрането додека не почне повторно со доење. Откако ќе се погрижите за овие предизвици, време е да поработите на прекинување на штрајкот.

Ако сте загрижени дека вашето бебе е болно и има некоја друга физичка непријатност што може да доведе до штрајк, посетете педијатар.

Кога станува збор за решавање на проблемот, постојат неколку начини на кои можете да го охрабрите вашето бебе да продолжи да цица:

– Легнете со бебето така што вашата кожа ќе ја допира неговата и нежно понудете му ги градите;
– Променете ја позицијата;
– Дојте во затемнета просторија за да не му се одвлекува вниманието;
– Обидете се да останете опуштени и да работите на ослободување од стресот;
– За време на доењето, направете сè за тоа да е позитивен момент за вас и за вашето бебе.

Кога треба да сум загрижена?

Повеќето штрајкови со доење траат од неколку дена до една недела. Ако вашето бебе одбие да јаде без оглед на тоа како се обидувате да го нахраните, ако изгуби тежина, нема влажни пелени или столица како и обично, ако покаже други знаци кои ве загрижуваат, веднаш контактирајте го вашиот педијатар.

Ако бебето цица поретко од порано, но пие млеко од шише, тоа очигледно е здраво и среќно и штрајкот не влијае врз неговото целокупно здравје.

Штрајкот може да биде фрустрирачко искуство и за мајката и за бебето, но не значи дека е време за дохрана и дека треба да се прекине доењето. По неколку дена и со малку убедување и поддршка, вие и вашето бебе најверојатно ќе се вратите на старата рутина.

Извор