Прашањата до психолозите и психотерапевтите може да ги испраќате на е-пошта: prasajpsiholog@deca.mk. Ве молиме прашањата пишувајте ги на кирилица. Нашето мото е: Кој прашува, дејствува! Кој си молчи, претпоставува!

ПРАШАЊЕ: Ќерка ми има две и пол години и откако родив друго дете лани, таа многу се приврза за баба ѝ. Со неа заспива, цело време ја бара и сака со неа да биде, а воопшто не сака да седи со нас. Пред да се породам, си седеше и со мене и со татко ѝ, заспиваше со нас, а сега ако не ја заспие баба ѝ, вреска, плаче… Како да постапиме, чудно е да не сака детето да седи со мајка си и татко си.

ОДГОВОР: Бабите и дедовците се ресурс за младото семејството, конкретна помош за управување со времето во различни ситуации. Често се случува тие да станат незаменливи во растењето на децата, уникатно и посебни личности, емотивни и доста едукативни. Односот на бабите и дедовците со детето е ослободен од конфликти, повеќе е заснован на игра, тие се подостапни, толерантни и подготвени да прават отстапки кои не секогаш родителот е во ситуација да ги прави. Eмоционалната приврзаност кон другите луѓе, освен родителите, за секое дете е апсолутно здрава и нормална.

Во текот на развојот детето се врзува за различни луѓе, развивајќи различни нивоа на приврзаност. Во зависност од ситуацијата во која се наоѓа и врз основа на различните улоги на луѓето со кои комуницира, развива и различни односи. Кога детето има развиено силна приврзаност со некој со кој се чувствува безбедно и каде што потребите му се задоволени, не е чудно да сака сѐ повеќе да биде во близина на таа личност.

Затоа, нема потреба да се грижите ако бабата ја игра улогата на важна негувателка во вашето семејство.
Јасно е дека кога времето поминато со бабата е значително поголемо од времето кое детето го поминува со вас може да се создаде нерамнотежа во приврзаноста со вас, која вие би можеле да ја доживеете како фрустрирачка. Она што можете да го направите е да го развивате односот со вашето дете и да бидете поприсутни и да ја извршувате вашата родителска улога.

Кога ќе кажеме да се поминува квалитетно време со детето, се мисли на способноста да се биде целосно присутен во активностите што ги спроведувате заедно, без одвлекување на вниманието, без разлика на нивното времетраење. Сигурно знаете какви активности сака вашата ќерка и затоа најдете начин да ги правите со неа, играјте, правете нешто заедно, цртајте, шетајте сами итн. Од друга страна, кога сте заедно, а сте зафатени со домашни работи, најдете начин да ја вклучите и да побарате помош од неа. Имајте активности со двете деца заедно и пред спиење читајте приказни.
Мама и тато се незаменливи, никој повеќе од вас не го познава вашето дете и не знае што е најдобро за него. Дури и кога односот со бабите и дедовците ќе стане, така да се каже, преференцијален, не би требало да се чувствувате „помалку вредни“ или да мислите дека некаде сте згрешиле. Важно е да постои доследност помеѓу вас – родителите и бабите и дедовците – во однос на воспитувањето бидејќи разликите можат да ги збунат децата.

Уживајте во љубовта што детето ја дели со својата баба, а заеднички уживајте во вашата љубов со сите дома.

Доколку ви е потребна дополнителна помош за тоа како да постапувате, како и за развојот на вашето дете, можете да закажете родителско советување и психоедукација на sovetuvanje@gmail.com

Одговара: Билјана Манасова-Јовановиќ, дефектолог и психотерапевт; Психотерапија и советување 
е-пошта: sovetuvanje@gmail.com

Психолозите и психотерапевтите ги одговараат прашањата според редоследот на нивното испраќање, а одговорите ќе се објавуваат на Деца.мк. Одговорите имаат психоедукативна функција и ги насочуваат родителите кон посеопфатни насоки на решавање на состојбата што ги мачи. Се разбира, покомплексните прашања подразбираат покомплексен пристап.

Рубриката „Прашај психолог“ овозможува стручна поддршка од психолози и психотерапевти на родителите при справување и решавање одредени актуелни прашања од психолошка природа на нивните деца и е резултат на соработка помеѓу Деца.мк и „Психотерапика“ – здружение за психологија и психотерапија. На прашањата одговараат психолози и психотерапевти, членови и соработници на здружението, како и самостојни експерти, соработници на Деца.мк.