Училиште во кое се промовира инклузивност, рамноправност и интеркултурност, во безбедна, позитивна и стимулативна средина за учење каде што сите се еднакви, вели директорката на ООУ„Кирил и Методиј“ – Стајковци, Анита Ангеловска, на нашето прашање што е дефиниција за добро училиште?
ООУ „Кирил и Методиј“ во Стајковци е добитник на наградата „13 Ноември“ за извонредни резултати во воспитно-образовната работа за 2021 година, како круна за досегашните достигнувања за оваа образовна институција. Ова училиште важи за едно од најсовремените, убаво уредено, а се издвојува со отворањето на првата сензорна соба, опремена со дидактички материјали и ресурси за ученици со попреченост; која можат да ја користат и децата со типичен развој, што создава можност за меѓусебно дружење. Училиштето може да се пофали со големи успеси, резултати на многубројни натпревари, организирање хуманитарни акции, домашни и меѓународни проекти кои овозможуваат зајакнување на демократската партиципација и меѓуетничката интеграција. Сево ова беше причина за Деца.мк да го посети ООУ „Кирил и Методиј“ и да поразговараме со дамата која стои зад кормилото на ова училиште.
![](https://deca.mk/wp-content/uploads/2021/11/oudirektorka.jpg)
За мене, терминот учител е комплимент
Од една страна, најодговорна, а, од друга страна, најдостоинствената професија, така Анита Ангеловска ја опишува професијата учител, која таа ја одбрала со многу љубов.
– Станав учител со огромна љубов и посветеност кон децата. За мене, учителската професија е најдостоинствената и најодговорна затоа што влијанието на учителот врз карактерот на детето е огромно. Понекогаш повеќе и од родителите. Кога велам учител, мислам на сите наставници, професори… За мене, овој термин е комплимент – вели Ангеловска.
Основното образование е семето на знаењето, но овде не се калеми само знаењето, туку и основите човекови вредности потребни за детето да порасне во една добра личност. Учителите овде се и педагози, кои имаат сериозна задача да ги извадат учениците на прав пат, да им ги дадат најважните лекции во животот, вели Ангеловска.
![](https://deca.mk/wp-content/uploads/2021/11/oukiril2.jpg)
– Наставникот е лидер во секој поглед за учениците. А да се биде лидер, значи секојдневно да се расте во своите доблести: човечност, разбраност, великодушност, храброст, самоконтрола, праведност и пожртвуваност. Не се согласувам со тезата дека добар педагог се раѓа. Тоа е вештина која се стекнува и се пренесува. Многу е важно каква е училишната клима во која работи наставникот и какви вредности се споделуваат. Новите генерации учители треба да бидат свесни дека со завршување на факултетот започнува нивното учење, затоа што секое дете е посебна приказна и бара посебен пристап. Нашата професија не може да се работи само колку да ни помине времето, затоа што остава белег и трајни последици – објаснува директорката.
Според неа, наставникот треба да биде пример за ученикот во секој поглед, преку облекувањето, однесувањето, зборувањето…
Технологијата ги прави децата понетрпеливи да останат со часови во клупа
![](https://deca.mk/wp-content/uploads/2021/11/oukiril3.jpg)
Поради фактот дека не можеме да го сопреме развојот на технологијата, Ангеловска го бара решението во тоа дека училиштата треба да се приспособуваат на модерното време и да ја прават наставата поинтересна.
– На пример, кога учениците играат улоги, кога дебатираат по одредени прашања, стекнуваат важни животни вештини. Прво, се ставаат во кожата на другиот и развиваат емпатија, а второ, истражуваат и вежбаат критички да размислуваат, што е многу важно. Една сложувалка или концептуална мапа може да биде многу забавна за децата, не бара некои посебни ресурси, а се постигнува многу – вели таа.
Притоа додава дека развојот на технологијата и глобализацијата се неминовни, но и понекогаш контрадикторни за луѓето.
– Од една страна, светот ви е на дланка и луѓето од различни континенти комуницираат меѓу себе, а, од друга страна, ве отуѓува од луѓето што ви се блиски – рече директорката.
![](https://deca.mk/wp-content/uploads/2021/11/oukiril4.jpg)
Според неа, дефиниција за добро училиште е онаа што го опишува нивното училиште.
– Училиште во кое се промовира инклузивност, рамноправност и интеркултурност, во безбедна, позитивна и стимулативна средина за учење каде што сите се еднакви. Се стремиме кон ефикасна и ефективна настава со цел да изградиме сестрани личности подготвени за личен напредок и оспособени за живеење во мултиетничко општество. Со заеднички активности, тимска работа, професионалност и одговорност, вклучување на родителите, локалната заедница и бизнис-секторот, да создадеме училиште со современ образовен процес кое нуди поддршка на детските права и мултикултурализмот, здравјето, сигурноста – вели Ангеловска.
Во нашето училиште учат среќни деца
Директорката ни раскажа дека секој работен ден ѝ започнува со обиколка на сите училници каде што има кус разговор со децата и наставниците. Постојаната непосредна комуникација е клучна за здрава училишна клима. Таа постојано се труди не само да биде присутна, туку и да учествува и помага во активностите што се случуваат во училиштето.
![](https://deca.mk/wp-content/uploads/2021/11/oukiril1.jpg)
– Не дека се наши, ама златни се. Во нашето училиште учат среќни деца. Тоа е најважно за едно дете, да се чувствува прифатено, удобно и комотно. Најсилен впечаток ми остави минатиот Осми март. Имав две случки кои ми предизвикаа солзи. Прво, кога ученик со пречки во развојот ми донесе негова изработка и првпат ме погледна в очи и ми го изговори името, потоа ученичките од нашето подрачно училиште во Страчинци читаа творби говорејќи како рајот е под нозете на мајката. Неодамна присуствував на час за слободни активности во кој учениците играа улоги на наставник и директор. До солзи се смеевме со нивната наставничка кога видовме како нѐ имитираат – објаснува директорката.
Учителствување во време на долга пандемија
– Јас постојано се шегувам дека за време на пандемијата станав матичен лекар. Не е лесно да се менаџира наставен процес во време на ковид-19. Водите грижа за сите вработени и ученици и нивните семејства. Секој е важен. Многу е важно што имаме директна соработка со Центарот за јавно здравје. Се трудиме децата да бидат почесто надвор, проветруваме, дезинфицираме. Но, морам да признам дека нѐ изморија грижата и внимателноста – додава Ангеловска.
912