Тешкотиите со социјалните и емоционалните вештини се карактеристичен белег на аутизмот или нарушување на спектарот на аутизам (ASD). Истражувањата посочуваат дека тоа може да биде затоа што одредени области на мозокот кои се поврзани со социјално-емоционалното функционирање се помалку развиени кај децата со аутизам. Додека сите лица со аутизам се соочуваат со предизвици при навигација во светот на емоциите и социјалната интеракција, квалитетната интервенција (колку порано, толку подобро) може да им помогне на децата да ги подобрат своите социо-емоционални вештини.
Социјалните вештини за деца вклучуваат:
• вештини за играње – на пример, чекање ред во игри или споделување играчки
• вештини за разговор – на пример, избирање за што да разговарате или каков говор на телото да користите
• емоционални вештини – на пример, управување со емоции и разбирање како се чувствуваат другите
• вештини за решавање проблеми – на пример, справување со конфликти или донесување одлуки во социјални ситуации.

Бебињата на кои подоцна им е дијагностициран аутизам можат да ги препознаат чувствата на сличен начин како и бебињата што вообичаено се развиваат. Но, овие деца побавно развиваат емоционални реакции.
До 5-7 години, многу деца со аутизам можат да препознаат кога сте среќни и тажни, но им е потешко со суптилни изрази на страв и гнев.
Во адолесценцијата, аутистичните тинејџери сè уште не се толку добри во препознавањето на стравот, гневот, изненадувањето и одбивноста како што се типичните тинејџери во развој.
Како возрасни, многумина продолжуваат да имаат проблем да препознаат некои емоции.
Децата со аутизам можат да научат социјални вештини и тие можат да се подобрат во овие вештини со вежбање. Овие идеи и стратегии можат да ви помогнат да ги изградите социјалните и емоционалните вештини на вашето дете:

Вежбајте играње
Можете да вежбате вештини за играње со вашето дете со користење играчки за глумење сцени. На пример, можете да прегрнете играчка, потоа да ја нахраните и да ја ставите в кревет, да организирате забава со чај или да создадете приказна користејќи сет за играње како фарма, бензинска пумпа или аеродром.

Пофалби
Давајте многу пофалби и охрабрување на вашето дете со аутизам кога ќе го видите како позитивно комуницира со другите. На пример, кога ќе видите дека вашето дете му нуди играчка на друго дете.

Играње улога
Можете да играте улоги и други социјални настани. На пример, вие и вашето дете може да направете игра со улоги каде што вашето дете сугерира што да игра со другото дете, играјте ги игрите што децата би можеле да ги играат заедно.
За постарите деца, може да се обидете да поставите ситуации кои вклучуваат социјален проблем – на пример, да им остане едно парче торта за две лица. Потоа можете да играте улоги за можни решенија, како и двајцата да ја делат тортата.

Социјални приказни
Социјалните приказни се начин за објаснување на социјалните ситуации на децата со аутизам. Илустрирана приказна или стрип што вклучува како се чувствува вашето дете и како се чувствуваат другите може да биде корисно за вашето дете.

Визуелна поддршка
Визуелната поддршка може да му помогне на вашето дете да научи нови вештини или да ги запомни социјалните вештини што веќе ги научило. Во зависност од потребите за учење на вашето дете, визуелните потпори може да бидат слики, зборови, списоци за проверка или картички. Исто така, може да помогне визуелната поддршка и за посочување емоции. На пример „Погледнете – таа се смее. Таа е среќна.“
Користете картички со емоции кои покажуваат израз на лицето и замолете го вашето дете да ви каже што претставува сликата (можете сами да ги направите користејќи цртежи, списанија или фотографии).
Читањето книги со приказни, особено оние со слики, е корисна алатка за да ги научите децата да учат за емоциите, нивните предизвикувачи и нивните резултати од однесувањето. Кога му читате приказна на вашето дете, можете едноставно да посочите различни ликови и да објасните малку за тоа како тие се чувствуваат и да поставувате прашања за нивните емоции. Ова е одличен начин да им помогнете да научат за предизвикувачите на емоции и да им помогнете да научат за ситуациите што можат да предизвикаат специфичен емоционален исход.

Поттикнувајте го на интеракција
Бидејќи можеби нема да иницираат интеракција, важно е вие да ја започнете. Играјте ѕиркање; направете тунел низ кој ќе лази вашето дете и ѕирнете низ едниот крај за да го поттикнете да ползи кон вас. Бидете сигурни дека му го привлекувате вниманието на вашето дете пред да го ангажирате. Влезете во неговата визија и употребете фраза како: „Слушај, те молам.“ Поттикнете го заедничкото внимание со играње игри или активности кои вклучуваат синхронизирање на движењата: танцување, скокање, тркачки автомобили итн.

Уметност и занаети
Заедно изработете семееен албуми. Со тоа ќе слушне многу приказни за интеракцијата помеѓу вас и роднините и вашите чувства кон нив и нивните кон вас.
Цртајте со различни тонови и придавајте им чувства на боите.
Уметничка активност со разгледница, празен шаблон за разгледница за украсување на предната страна и за пишување порака на задната страна. Испратете порака до некој посебен за да му го разубави денот.

Играјте активности за подредување емоции.
Една од добрите активности што може да им помогне на децата да ги стават емоциите во контекст е играњето игри со сортирање. Можеме да побараме од децата да ги подредат емоциите во две категории: позитивни емоции и негативни емоции. Тоа значи дека имаме емоции кои ни се допаѓаат и уживаме и сакаме почесто да ги доживуваме. Емоциите како среќа, возбуда или гордост ќе одат во оваа категорија. И потоа, имаме емоции кои не сакаме да ги имаме и се негативни, како што се тажни, засрамени или лути. Оваа активност е одлична затоа што не само што помага во разбирањето на емоциите, туку е и одличен почеток за продолжување кон учење стратегии за регулирање на емоциите и смирување. Кога децата знаат кои емоции се негативни, тогаш можеме да им помогнеме да научат како да управуваат со нив и како да користат различни стратегии за да се справат со нив.

Користете слики или фрази
Можете да му помогнете на вашето дете со тоа што ќе побарате од него да пополни упатства за такви чувства. На пример, на секое ниво, можете да побарате да ја заврши мислата „Се чувствувам среќно кога…“ на секоја емотивна слика. Ако детето не реагира на таквите инструкции, можете да опишете сценарио од почеток до крај и да побарате од вашето дете да примени емоционален одговор на сценариото што го опишавте и да потврди како тоа одговара на сликите на табелата.

Играјте ја играта „што ако…“
Ако можете да замислите ситуација која би ја тестирала емоционалната регулација на вашето дете, вербализирајте ја таа ситуација и замолете го вашето дете да ја замисли и да разговарате со него во мирен амбиент за тоа што би можело да направи ако таква ситуација се случи во реалниот живот.

На децата со аутизам им е тешко да ги користат социјалните вештини што ги научиле во еден амбиент во други ситуации. На пример, вашето дете можеби ќе може да споделува моливи дома со своите браќа и сестри, но не и на училиште со своите соученици. За да му помогнете да ги користи вештините на училиште, разговарајте со наставникот на вашето дете за да бидете сигурни дека и двајцата ги користите истите инструкции.

Друго што е многу важно, секојпат кога детето ќе може да идентификува предизвикувач за емоции, да ги разбере емоциите или соодветно да одговори на нив, важно е да му дадеме многу пофалби и засилувања за да може јасно да разбере дека извршило добра работа.
Ако детето не е во состојба соодветно да ги разбере или да одговори на емоциите, треба да му дадеме јасни поттикнувања и знаци.

Потсетувањата можат да им помогнат на децата да учат без многу обиди и грешки и тие се многу ефикасни за учење на која било нова вештина.