Овие моќни намирници се полни со витамини и нутритиенти кои го чуваат здравјето на идните мајки и на бебето во текот на бременоста, но и подоцна

Нема подобар мотив за здрави прехранбени навики од сознанието дека сте трудни. Вашето тело доживува големи промени, па вие и вашето бебе треба да внесувате доволно витамини и нутритиенти за да бидете здрави и посилни. Но што сè се смета за суперздрава храна во бременоста? Прочитајте зошто е препорачливо да ги јадете овие 10 намирници во текот на бременоста.

Јајца
Без оглед дали ги сакате на око, кајгана или варени – јајцата се златен стандард во исхраната на секоја трудница. Тие се полни со протеини, фолна киселина, железо и холин. Зошто трудниците треба редовно да јадат јајца? Не само затоа што јајцата се многу пристапна храна, универзален и соодветен извор на протеини, тие содржат и холин, хранлива состојка од групата Б-комплекс. Тој  им е потребен на трудниците бидејќи е важен за создавање и за развој на нервниот систем на бебето во матката. Клучен е и за мозокот, ‘рбетниот мозок и за способноста за учење. Поголемиот внес на холин во текот на второто тримесечје покажал и поврзаност со подобрата визуелна меморија кај децата на возраст до седум години. Европската организација за безбедност на храната препорачува да се внесуваат 400 мг холин на ден.

Сладок компир
Слаткиот компир е полн со влакна, витамин Б, калиум (дури има повеќе отколку во бананите), витамин Ц и железо, како и бакар и бета-каротен.
Слаткиот компир треба да се издвои поради бета-каротенот, антиоксиданс кој вашето тело го претвора во витамин А. Како што знаете, витаминот А игра важна улога во развојот на очите на бебето, коските и кожата. Слаткиот компир е и извонреден извор на железо и содржи бакар, минерал кој му помага на телото да го апсорбира железото. Затоа, вклучете го слаткиот компир во вашата исхрана, одличен е и како пире, печен, а и како додаток на десерти поради својата природна сладост.

Јаткасти плодови
Овие крцкави и практични грицки се полни со здрави масти (вклучувајќи и омега 3-масни киселини), протеини, влакна и разни витамини и минерали. Ореви, лешници и бадеми се дел од јаткастите плодови што можете да ги грицкате, а кои ќе ви помогнат да примите 300 мг магнезиум, колку што се препорачува во бременоста.
Грицкањето храна полна со магнезиум помага да се намали ризикот од предвремено породување и одлично влијае врз вашиот мозок и придонесува за развој на невролошкиот систем на бебето во стомакот. Шолја исечкани бадеми содржи речиси 250 мг магнезиум и не е лошо секогаш да ги имате крај себе како меѓуоброк. Сепак, иако во овие денови имате чувство дека ќе изедете планина од храна, одберете ф’стаци со лушпи. Ф’стаците имаат помалку магнезиум, околу 150 мг од шолја, и потребно е подолго време да ги изедете поради чистењето на лушпите, поради што се супер грицки зашто на телото му давате повеќе време да регистрира дека е најадено.

Грав и леќа
Ако не сте голем обожавател на месо или воопшто не го јадете, гравот или леќата се одличен извор на протеини и железо, како и на фолна киселина, влакна и калциум. А гравот, особено оној во тавче, е полн со цинк. Гравот и леќата ги снабдуваат трудницата и бебето со минерали кои инаку се наоѓаат во намирници од животинско потекло, па затоа се многу погодни за вегетаријанки или веганки. Сепак, ако имате проблем при варењето, други добри извори на цинк и други нутритиенти се месо, пиле, млеко, житарки, грашок, индиски ореви, бела риба и морски ракчиња.

Немасно месо
Секако, знаете дека е полно со протеини, но немасното говедско и свинско се полни со железо и витамин Б.
На вашето тело сега му требаат многу повеќе протеини (околу 25 дополнителни грама на ден) за да може да му обезбедат на бебето правилен развој на мускулите. Истото важи и за железото. Недоволниот внес на тој минерал може да го наруши растот и развојот на бебето, да доведе до предвремено породување и мала телесна тежина на бебето. Железото е важно и за мајките за да се спречи појава на анемија. Во бременоста се зголемува волуменот на крвта, па затоа се зголемува потребата за железо – дневно приближно 27 гр повеќе од вообичаено. Плус, немасното месо содржи прилично голема доза на витамин Б6, кој помага за развој на мозокот на бебето и помага полесно да се поминат утринските мачнини, и Б12, кој помага да се зачуваат нервите и црвените крвни зрнца.

Сок од портокал
Со чаша свежо исцеден сок од портокал наутро ја дополнувате својата доза на фолна киселина, калиум и витамин Ц. Веројатно многу пати сте слушнале за благодатите на фолатите и фолната киселина. Тие се клучни за спречување одредени вродени маани рано во бременоста, но и за одржување на здравата бременост потоа – затоа обидете се да ја внесувате препорачаната доза од 0,4 мг фолна киселина на ден. Калиумот од сокот од портокал е важен за одржување на функцијата на мускулите, за добрата состојба на метаболизмот, како и за општата здравствена состојба. Трудниците имаат поголема потреба за калиум поради зголемениот волумен на крвта, а витаминот Ц спречува настинки и придонесува за одржување на имунолошкиот систем, подобра апсорпција на железото во организмот и здравјето на коските на детето и на мајката.

Треба да се спомене дека одличен извор на витамин Ц се и брокулите, доматите, црвената пиперка и мангото, кое содржи дури 20 различни витамини и минерали. Но, секојдневната консумација на свежо исцеден сок од портокал осигурува внес на витаминот Д, кој ја подобрува циркулацијата на крвта во постелката и придонесува за подобра апсорпција на калиумот.

Јогурт
Изненадување! Обичниот јогурт содржи повеќе калциум отколку млекото. Покрај тоа, богат е со протеини, витамин Б, цинк и нутритиенти кои се заслужни за изградбата на коските.
Калциумот е основниот нутритиент за да бидат коските и забите здрави, а на бебето му помага во развојот на коскената маса. На идните мајки им се препорачуваат 1.000 мг калциум на ден, односно барем 3 оброци богати со калциум. Треба да се нагласи дека ако на вашето тело му недостига калциум во бременоста, се изложувате на ризик од остеопороза подоцна во животот. Совет: Јогуртот е одличен меѓуоброк/десерт заедно со овошје по ваш избор!

Овесна каша
Овесните снегулки се полни со влакна, протеини и витамин Б6.
Секое утро јадете голема чинија овесна каша. Целите житни зрнца се одлични за одржување на енергијата, особено ако сте исцрпени од утринските мачнини. Покрај тоа, овесната каша ќе ви помогне со уште една трудничка непријатност – запекот. Овесните снегулки можете да ги вклучите во храната и на друг начин – може да направите од нив палачинки или мафини.

Листетст зеленчук
Бидејќи е преполн со антиоксиданти и нутритиенти, темнозелениот зеленчук, како блитва, брокула, кељ, спанаќ, треба да биде на менито на секоја трудница. Оваа суперхрана е особено важна за идните мајки и за развојот на бебињата бидејќи е богата со калциум, калиум, фолна киселина, железо и витамин А. Ако не сте преголем обожавател на ваквиот зеленчук, портокалите се добар извор на витамин А.

Лосос
Оваа кралска риба е богата со омега 3-масни киселини и протеини. Постојат многу причини да го вклучите лососот во исхраната во текот на бременоста. Омега 3-масните киселини помагаат за развојот на мозокот на бебето, а поголемото ниво на DHA кај новороденчињата е поврзано со поголем коефициент на интелигенција, напредни моторички способности и помал број на невролошки проблеми подоцна. Омега 3-масните киселини се одлични за развојот на очите на детето, а лососот е одличен извор на немасни протеини за идните мајки. Ако сте загрижени за можната опасност од зголемена количина на жива што се наоѓа во морската храна, имајте на ум дека оваа риба се смета за безбедна за консумација во бременоста, но сепак можете да го ограничите внесот на два пати неделно.